తమిళ స్టార్ హీరో విశాల్ నటించిన ‘రాయుడు’ సినిమా గత శుక్రవారం ప్రేక్షకుల ముందుకు వచ్చిన విషయం తెలిసిందే. పూర్తిగా మాస్ ప్రేక్షకులనే టార్గెట్ చేసుకొని తెరకెక్కిన ఈ సినిమా తమిళంలో సూపర్ హిట్ కాగా, తెలుగులోనూ మంచి కలెక్షన్స్ తెచ్చుకుంటూ దూసుకుపోతూండడం గురించి ప్రత్యేకంగా చెప్పుకోవాలి. తెలుగులో నిన్నటితో వారం రోజులు పూర్తి చేసుకున్న ఈ సినిమా, వారం రోజుల్లో ఏపీ, తెలంగాణా రెండు రాష్ట్రాల్లో కలుపుకొని 5 కోట్ల రూపాయల షేర్ వసూలు చేసింది.
దీంతో ఈ సినిమాను తెలుగులో విడుదల చేసిన హరివేంకటేశ్వర పిక్చర్స్ సంతోషంలో మునిగిపోయింది. రెండో వారం కూడా బీ, సీ సెంటర్లలో సినిమా బాగా ఆడుతోందని, ఇప్పటికీ సినిమా 200లకు పైగా థియేటర్లలో ప్రదర్శితమవుతోందని ‘రాయుడు’ టీమ్ తెలిపింది. ముత్తయ్య దర్శకత్వంలో తెరకెక్కిన ఈ సినిమాలో విశాల్ ఊర మాస్ క్యారెక్టర్‌లో కనిపించారు. విశాల్ సరసన శ్రీ దివ్య హీరోయిన్‌గా నటించారు.
