నంద‌మూరి క‌ళ్యాణ్ రామ్ నటిస్తున్న తాజా చిత్రం ప్ర‌స్తుతం శ‌ర‌వేగంగా షూటింగ్ జ‌రుపుకుంటోంది. క‌ళ్యాణ్ రామ్ కెరీర్ లో 21వ చిత్రంగా తెర‌కెక్కుతున్న ఈ సినిమాను NKR21 అనే వ‌ర్కింగ్ టైటిల్ తో రూపొందిస్తున్నారు. ఈ సినిమాను ప్ర‌దీప్ చిలుకూరి పూర్తి యాక్ష‌న్ ఎంట‌ర్టైన‌ర్ గా తెరెక్కిస్తున్నారు.
కాగా, ఈ సినిమాలో లేడీ సూప‌ర్ స్టార్ విజ‌య‌శాంతి ఓ కీల‌క పాత్ర‌లో నటిస్తున్న సంగ‌తి తెలిసిందే. అయితే, ఆమె పుట్టినరోజు కానుక‌గా ఆమె పాత్ర‌ను ఇంట్రొడ్యూస్ చేశారు మేక‌ర్స్. విజ‌య‌శాంతికి ఎంతో పేరును తీసుకొచ్చిన ‘వైజ‌యంతి IPS’ గా మ‌రోసారి ఆమె తన స‌త్తా చాట‌నున్నారు. ఈ సినిమాలోనూ ఆమె ప‌వ‌ర్ఫుల్ పోలీస్ ఆఫీస‌ర్ గా క‌నిపిస్తున్నారు.
“వైజ‌యంతి IPS.. త‌ను ప‌ట్టుకుంటే పోలీస్ తుపాకీకి ధైర్యం వ‌స్తుంది.. వేసుకుంటే యూనిఫాంకు పౌరుషం వ‌స్తుంది.. త‌నే ఒక యుద్ధం.. నేనే తన సైన్యం..” అంటూ క‌ళ్యాణ్ రామ్ చెప్పిన డైలాగ్ ప్రేక్ష‌కుల‌ను ఆక‌ట్టుకుంటుంది. ఇక ఈ సినిమాలో అందాల భామ సాయీ మంజ్రేక‌ర్ హీరోయిన్ గా న‌టిస్తోంది. శ్రీకాంత్, సోహెల్ ఖాన్ త‌దిత‌రులు ఇత‌ర ముఖ్య పాత్ర‌ల్లో నటిస్తున్న ఈ సినిమాకు అజ‌నీష్ లోక్ నాథ్ సంగీతం అందిస్తున్నారు. అశోక్ వ‌ర్ధ‌న్ ముప్ప, సునీల్ బలుసు ఈ సినిమాను ప్రొడ్యూస్ చేస్తున్నారు.
