ఐకాన్ స్టార్ అల్లు అర్జున్ ప్రస్తుతం ది మోస్ట్ అవైటెడ్ మూవీ ‘పుష్ప-2’లో బిజీగా ఉన్నాడు. ఈ సినిమాను క్రియేటివ్ జీనియస్ సుకుమార్ డైరెక్ట్ చేస్తుండగా డిసెంబర్ 6న వరల్డ్‌వైడ్ గ్రాండ్ రిలీజ్‌కి రెడీ అయ్యింది. ఇక ఈ సినిమాతో బన్నీ మరోసారి బాక్సాఫీస్ రికార్డులను తిరగరాయడం ఖాయమని అభిమానులు ధీమా వ్యక్తం చేస్తున్నారు.
కాగా, బన్నీ తన నెక్ట్స్ చిత్రాన్ని ఎవరితో చేస్తాడా అనే చర్చ ప్రస్తుతం సోషల్ మీడియాలో జోరుగా సాగుతోంది. అయితే, తమిళ సక్సెస్‌ఫుల్ డైరెక్టర్ అట్లీ అల్లు అర్జున్‌తో ఓ సినిమా చేస్తాడనే వార్త ఎప్పటినుంచో ఇండస్ట్రీ వర్గాల్లో వినిపిస్తూ వచ్చింది. అయితే, తాజాగా మరోసారి ఈ కాంబినేషన్ గురించి నెట్టింట చర్చ సాగుతోంది. ప్రస్తుతం అట్లీ, అల్లు అర్జున్ కాంబినేషన్ మూవీకి సంబంధించిన చర్చలు జరుగుతున్నాయని.. ఒకట్రెండు రోజుల్లో ఫైనల్ అవుతుందనే టాక్ వినిపిస్తోంది.
ఇక ఈ క్రేజీ ప్రాజెక్ట్‌కి మ్యూజిక్ సెన్సేషన్ అనిరుధ్ రవిచందర్ సంగీతం అందిస్తాడని తెలుస్తోంది. దీంతో ఈ ప్రాజెక్ట్‌కి AAA అనే హాష్‌ట్యాగ్ ఇచ్చారు అభిమానులు. అట్లీ తన లాస్ట్ మూవీ ‘జవాన్’తో ఇండియన్ బాక్సాఫీస్ దగ్గర సెన్సేషనల్ హిట్ అందుకున్నాడు. ఇప్పుడు బన్నీతో గనక సినిమా చేస్తే వీరి కాంబినేషన్‌లో రాబోయే సినిమా ఇండియన్ బాక్సాఫీస్ రికార్డులను తిరగరాయడం ఖాయమని ఫ్యాన్స్ అంటున్నారు. మరి ఈ ప్రాజెక్ట్ ఓకే అవుతుందా లేదా అనేది చూడాలి.
