టాలీవుడ్ నటుడు, అక్కినేని నాగ చైతన్య యూత్ ఎంటర్టైనర్ జోష్‌తో చిత్ర పరిశ్రమలోకి అడుగుపెట్టాడు. ఆ తర్వాత అతను కెరీర్ లో వెనుదిరిగి చూసుకోలేదు. చైతన్య ప్రత్యేకమైన స్క్రిప్ట్‌లను ఎంచుకుని అత్యంత విజయవంతమైన నటులలో ఒకరిగా నిలిచాడు. విలక్షణమైన పాత్రలు పోషించి అనేక విజయాలను అందించిన నటుడు, ఇప్పుడు తెలుగు సినీ పరిశ్రమలో 15 సంవత్సరాలు పూర్తి చేసుకున్నాడు.
ఈ సందర్భంగా అతని మోస్ట్ వెయిటింగ్ పాన్ ఇండియన్ ఫిల్మ్ తండేల్ నుండి మేకర్స్ సరికొత్త పోస్టర్‌ను విడుదల చేశారు. ఈ పోస్టర్‌లో చైతన్య రగ్డ్ అవతార్‌లో కనిపిస్తున్నాడు. అతని ముఖంలోని చిరునవ్వు లుక్ కి మరింత ఆకర్షణ గా నిలిచింది. సముద్రం దగ్గర పార్క్ చేసిన ఫిషింగ్ బోట్ మీద నిలబడి ఉన్నాడు చైతూ. ఆంధ్రప్రదేశ్‌ లోని శ్రీకాకుళం జిల్లాలోని డి.మచ్చిలేశం గ్రామంలో జరిగిన యదార్థ సంఘటనల ఆధారంగా రూపొందిన రొమాంటిక్ డ్రామా తండల్. చందూ మొండేటి దర్శకత్వం వహిస్తున్న ఈ చిత్రాన్ని బన్నీ వాస్ భారీ స్థాయిలో నిర్మిస్తున్నారు. డ్యాన్సింగ్ క్వీన్ సాయి పల్లవి కథానాయిక. అల్లు అరవింద్ సమర్పకుడుగా వ్యవహరిస్తున్న ఈ చిత్రానికి దేవి శ్రీ ప్రసాద్ స్వరాలు సమకూరుస్తున్నారు.
