ప్రస్తుతం టాలీవుడ్‌లో తీవ్ర చర్చకు దారి తీసిన తెలంగాణ మంత్రి కొండా సురేఖ వ్యాఖ్యలపై యావత్ ఇండస్ట్రీ నుంచి విమర్శలు వెల్లువెత్తుతున్నాయి. ఓ బాధ్యతగల పదవిలో ఉన్న మహిళా మంత్రి సినిమా వ్యక్తుల వ్యక్తిగత జీవితాలను రాజకీయాల కోసం వాడటం ఏమిటని పలువురు నెట్టింట విమర్శలు చేస్తున్నారు. అటు సోషల్ మీడియాలోనూ కొండా సురేఖ వ్యాఖ్యలపై తీవ్ర ట్రోలింగ్ జరుగుతోంది.
ఈ క్రమంలో మరో హీరోయిన్ రకుల్ ప్రీత్ సింగ్ కూడా ఈ కామెంట్స్‌పై స్పందించింది. తెలుగు సినిమా పరిశ్రమలోని మహిళలపట్ల రాజకీయ నేతలు చేస్తున్న నిరాధారమైన వ్యాఖ్యలు నిజంగా కలిచివేస్తున్నాయని.. సాటి మహిళా మంత్రి కూడా సినిమా రంగంలోని మహిళలపై ఈ రకమైన వ్యాఖ్యలు చేయడం నిజంగా హేయమైన చర్యగా భావిస్తున్నానని ఆమె పేర్కొంది. సినిమా రంగానికి చెందిన తాము డిగ్నిటీ మెయింటెయిన్ చేసేందుకు చాలా సైలెంట్‌గా ఉంటామని.. అయితే తమ మౌనాన్ని చేతగానితనంగా భావించొద్దని రకుల్ ఈ సందర్భంగా తెలిపింది.
తనకు ఎలాంటి రాజకీయ పార్టీతో గాని, రాజకీయ నేతలతో కాని సంబంధం లేకున్నా తన పేరును తీసుకొస్తున్నందుకు చాలా బాధగా ఉందని రకుల్ తెలిపింది. తన పేరును రాజకీయాల్లోకి లాగొద్దని ఆమె ఈ సందర్భంగా కోరింది. మీకు నచ్చిన కథను సినిమా వారిపై రుద్ది ప్రజల్లోకి అసత్య ప్రచారాలను తీసుకెళ్లొద్దని రకుల్ ఈ సందర్భంగా తన ఎక్స్ వేదికలో పోస్ట్ చేసింది.
Telugu Film Industry is known worldwide for its creativity and professionalism. I've had a great journey in this beautiful industry and still very much connected.
It pains to hear such baseless and vicious rumours being spread about the women of this fraternity. What's more…— Rakul Singh (@Rakulpreet) October 3, 2024
