విడుదల తేదీ : అక్టోబర్ 10, 2024
123తెలుగు.కామ్ రేటింగ్ : 2.75/5
నటీనటులు : రజినీకాంత్, అమితాబ్ బచ్చన్, ఫహాద్ ఫాజిల్, మంజు వారియర్, రితికా సింగ్, అభిరామి, దుషారా విజయన్, రోహిణి, రావు రమేష్ తదితరులు
దర్శకుడు : టి.జె. జ్ఞానవేల్
నిర్మాతలు : ఎ. సుభాస్కరన్
సంగీత దర్శకుడు : అనిరుధ్ రవిచందర్
సినిమాటోగ్రఫీ : ఎస్.ఆర్. కతీర్
ఎడిటర్ : ఫిలోమిన్ రాజ్
సంబంధిత లింక్స్: ట్రైలర్
తమిళ సూపర్ స్టార్ రజినీకాంత్ నటించిన లేటెస్ట్ మూవీ ‘వేట్టయన్’. దర్శకుడు జ్ఞాన్‌వేల్ దర్శకత్వంలో వచ్చిన ఈ సినిమా ఈ రోజు ప్రేక్షకుల ముందుకు వచ్చింది. మరి ఈ చిత్రం, ఆడియన్స్‌ ను ఏ మేరకు మెప్పించిందో సమీక్షలోకి వెళ్లి తెలుసుకుందాం!
కథ :
అతియన్ (రజినీకాంత్) ఒక ఎన్ కౌంటర్ స్పెషలిస్ట్. అన్యాయం జరిగితే, ఆ అన్యాయం హద్దులు దాటిపోయింది అనిపిస్తే ఎన్ కౌంటర్ చేసైనా న్యాయం చేయాలని భావించే వ్యక్తి అతియన్. ఇలాంటి అతియన్ కి స్కూల్ టీచర్ శరణ్య (దుషారా విజయన్) ఓ సమస్య ద్వారా పరిచయం అవుతుంది. అన్యాయం పట్ల ఆమె చూపించిన ధైర్యానికి అతియన్ మెచ్చుకుంటాడు. ఈ క్రమంలో జరిగిన కొన్ని నాటకీయ పరిణామాల మధ్య.. స్కూల్ టీచర్ శరణ్య అతి దారుణంగా చంపబడుతుంది. అసలు ఆమెను చంపిన వ్యక్తి ఎవరు ?, ఈ హత్య కేసులో అతియన్ ఒక అమాయకుడిని ఎలా చంపాడు ?, చివరకు అసలు హంతకుడిని అతియన్ ఎలా కనిపెట్టాడు ?, ఈ మొత్తం కథలో నటరాజ్ (రానా) పాత్ర ఏమిటి ? అనేది మిగిలిన కథ.
ప్లస్ పాయింట్స్ :
పవర్‌ ఫుల్ ఎన్‌కౌంటర్ స్పెషలిస్ట్‌గా రజినీకాంత్ అద్భుతంగా నటించాడు. ముఖ్యంగా రజినీ స్టైల్ సినిమాలో హైలైట్ గా నిలిచింది. అలాగే, రజినీకాంత్ మాస్ ఎలివేషన్స్ అండ్ యాక్షన్ సీన్స్ కూడా అదిరిపోయాయి. సీరియస్ క్రైమ్స్ చేసి తప్పించుకునే చెడ్డవాళ్లకి న్యాయపరంగా మాత్రమే, శిక్ష పడాలని భావించే అమితాబ్ బచ్చన్ ఒకవైపు, హద్దులు దాటి అయినా న్యాయం చేయాలని భావించే రజనీకాంత్ పాత్ర మరోవైపు.. ఈ రెండు పాత్రలను డిజైన్ చేసిన విధానం బాగుంది. అమితాబ్ తన పాత్రలో ఒదిగిపోయారు.
రజినీకాంత్ వర్సెస్ రానా దగ్గుబాటి మధ్య సీన్స్ తో పాటు వారి మధ్య డైలాగ్స్ కూడా బాగున్నాయి. రానా కూడా చాలా బాగా నటించాడు. సెకండ్ హాఫ్ లో రానా పాత్రను కూడా బాగా ఎస్టాబ్లిష్ చేశారు. ఈ సినిమాలో మరో కీలక పాత్రలో నటించిన ఫహాద్ ఫాజిల్ నటనతో పాటు అతని పాత్ర కూడా కనెక్ట్ అయ్యింది. ఇతర ప్రధాన పాత్రల్లో మంజు వారియర్, రితికా సింగ్ ఆకట్టుకున్నారు. అభిరామి, దుషారా విజయన్, రోహిణి, రావు రమేష్ లతో పాటు మిగిలిన నటీనటులు కూడా తమ నటనతో మెప్పించారు.
ఓ హత్యతో కథలో సీరియస్ టర్న్ తీసుకుని ఫస్ట్ హాఫ్ ని డ్రైవ్ చేయడం బాగుంది. అనిరుద్ బ్యాగ్రౌండ్ స్కోర్ మొత్తం సినిమాకే హైలైట్ గా నిలిచింది. దర్శకుడు జ్ఞాన్‌వేల్ ఈ చిత్రంలో యాక్షన్ ఎలిమెంట్స్ తో పాటు ఎమోషనల్ కంటెంట్ ను కూడా బాగానే ఎలివేట్ చేశాడు.
మైనస్ పాయింట్స్:
దర్శకుడు టి.జె. జ్ఞానవేల్ తీసుకున్న మెయిన్ పాయింట్, మరియు ప్రధాన పాత్రలు, ఆ పాత్రల తాలూకు సంఘర్షణ బాగా ఆకట్టుకున్నా… సినిమాలో ఇంట్రెస్టింగ్ ఎలిమెంట్స్ ఆశించిన స్థాయిలో లేకపోవడం సినిమాకి మైనస్ అయింది. పైగా కథను ఎలివేట్ చేస్తూ దర్శకుడు రాసుకున్న సీరియస్ ట్రీట్మెంట్ ల్యాగ్ లేకుండా, ఇంకా ఎమోషనల్ గా ఉండి ఉంటే బాగుండేది.
అలాగే, సెకండ్ హాఫ్ లో వచ్చే కొన్ని బోరింగ్ సీన్స్ ను కూడా తగ్గించుకోవాల్సింది. ప్రధానంగా రానా పాత్రను లాజికల్ గా, బలమైన కాన్ ఫ్లిక్ట్ తో రాసుకుని ఉండి ఉంటే సినిమాకి ఇంకా బెటర్ అవుట్ ఫుట్ వచ్చి ఉండేది. అయితే, దర్శకుడు రాసుకున్న మెయిన్ క్యారెక్టర్స్, ఆ క్యారెక్టర్ల పాయింట్ ఆఫ్ వ్యూలో వచ్చే సన్నివేశాలు ఆకట్టుకున్నప్పటికీ.. ఇన్విస్టిగేషన్ సీన్స్ చాలా స్లోగా ఉండటం, అలాగే సెకండాఫ్ ఆసక్తికరంగా సాగకపోవడం వంటి అంశాలు సినిమాకి బలహీనతలు గా నిలిచాయి.
సాంకేతిక విభాగం :
ఇక సాంకేతిక నిపుణుల గురించి మాట్లాడుకుంటే.. సంగీత దర్శకుడు అనిరుధ్ రవిచందర్ అందించిన సంగీతం బాగుంది. ముఖ్యంగా యాక్షన్ సీన్స్ లో అనిరుధ్ రవిచందర్ అందించిన బ్యాక్ గ్రౌండ్ స్కోర్ చాలా చాలా బాగుంది. ఎడిటింగ్ బాగుంది గాని, సెకండ్ హాఫ్ ను ఇంకా టైట్ గా ట్రిమ్ చేసి ఉంటే, సినిమాకి ప్లస్ అయ్యేది. ఎస్.ఆర్. కతీర్ సినిమాటోగ్రఫీ కూడా ఆకట్టుకునేలా ఉంది. యాక్షన్ సన్నివేశాలలోని విజువల్స్ ను ఆయన చాలా సహజంగా చూపించారు. నిర్మాత ఎ. సుభాస్కరన్ పాటించిన నిర్మాణ విలువలు చాలా బాగున్నాయి.
తీర్పు :
పర్ఫెక్ట్ యాక్షన్ ప్యాకెడ్ తో పక్కా క్రైమ్ యాక్షన్ థ్రిల్లర్ గా వచ్చిన ఈ ‘వేట్టయన్’ సినిమాలో రజనీ స్టైల్ అండ్ యాక్టింగ్ తో పాటు యాక్షన్ సీన్స్ అండ్ ఎమోషనల్ కంటెంట్ సినిమాలో హైలైట్ గా నిలిచాయి. కాకపోతే, కొన్ని సీన్స్ బోర్ గా సాగడం, మరియు సెకండాఫ్ ప్లే కొన్ని చోట్ల ఆసక్తికరంగా సాగకపోవడం సినిమాకి మైనస్ అయ్యాయి. ఓవరాల్ గా, ఈ సినిమా సూపర్ స్టార్ ఫ్యాన్స్ తో పాటు క్రైమ్ యాక్షన్ డ్రామా ఇష్టపడేవారికి మాత్రమే కనెక్ట్ అవుతుంది.
123telugu.com Rating: 2.75/5
Reviewed by 123telugu Team
