నందమూరి బాలకృష్ణ భక్తిరస మహత్తర చిత్ర రాజం ‘శ్రీ రామ రాజ్యం’ ప్రస్తుతం పోస్ట్ ప్రొడక్షన్ పనులు జరుపుకుంటుంది. విస్తృతమైన డిఐ మరియు గ్రాఫిక్స్ పని వల్ల ఈ చిత్ర విడుదల ఆలస్యం అవుతునట్టు తెలుస్తుంది. గతంలో చెప్పినట్టు ఈ చిత్రం నవంబర్ 10 వ తేదీన విడుదలయ్యే అవకాశం కనపడటంలేదు. తాజా నివేదికల ప్రకారం ఈ సినిమా నవంబర్ 28 న తెరల పైకి వచ్చే అవకాశాలు మెండుగా ఉన్నాయి.
ఈ చిత్రానికి లెజండరీ డైరెక్టర్ బాపు దర్శకత్వం వహిస్తున్నారు. బాపు జీవితకాల అనుంగుడు రమణ తన తుది శ్వాస విడిచేవరకూ ఈ చిత్ర స్క్రిప్ట్ కు మెరుగులు దిద్దారు. సంగీతం విద్వాంసుడు ఇళయరాజా ఈ చిత్రానికి మ్యూజిక్ ను అందిస్తుండగా, జొన్నవిత్తుల కలం నుండి గీతాలు జాలువారాయి. ఈ చిత్ర ఆడియో, విడుదల నుంచీ మంచి స్పందన అందుకుంటోంది.
శ్రీరాముడు, కృష్ణుని పాత్రలు చేయటంలో సీనియర్ ఎన్టీఆర్ దిట్ట. అలాంటి పాత్రను ప్రస్తుతం నందమూరి నటసింహం బాలయ్య పోషిస్తుండటంతో అందరి దృష్తి ఈ సినిమా పైనే ఉంది. ఈ మహత్తర చిత్రంలో బాలయ్య బాబు ఎలా నటిస్తారో అని అంతా ఉత్సుకతతో వేచిచూస్తున్నారు. నయనతార సీత పాత్రను పోషిస్తుండగా, సుప్రసిద్ధ నటుడు అక్కినేని నాగేశ్వరరావు వాల్మీకి పాత్రలో నటిస్తున్నారు. ఇంకా లక్ష్మణ, భూదేవి పాత్రల్లో శ్రీకాంత్, రోజా కనిపిస్తారు.
కాగా, ఈ సినిమాకు సంబంధించి చిత్ర పరిశ్రమలో సానుకూల చర్చ నడుస్తుంది. ఈ సినిమాకి సంబంధించి విసృతమైన, తాజా సమాచారాన్ని మీకోసం ఎప్పటికప్పుడు అందిస్తూనే ఉంటాం. అందుకోసం చూస్తూనే ఉండండి 123తెలుగు.కాం
