పండుగ సీజన్ వస్తుందంటే సినిమా రిలీజ్‌లతో బాక్సాఫీస్ కిటకిటలాడుతుంది. పండుగలకు సినిమా వాళ్లు కూడా వీలైనన్ని సినిమాలను రిలీజ్ చేసి పండుగ సీజన్‌ని క్యాష్ చేసుకోవాలని చూస్తుంటారు. ఇక సంక్రాంతి, దసరా, దీపావళి వంటి పండుగలకు ఈ పోటీ తీవ్రంగా నెలకొంటుంది. ఇప్పుడు మరోసారి దీపావళి పండుగకు బాక్సాఫీస్ దగ్గర పలు సినిమాలు పోటీకి సిద్ధమవుతున్నాయి.
దీపావళి రేసులో కేవలం సౌత్ సినిమాలే కాకుండా నార్త్ సినిమాలు కూడా బరిలోకి దిగుతున్నాయి. ఈసారి దీపావళి రేసులో ముఖ్యంగా చెప్పుకోవాల్సిన సినిమాలు కొన్ని ఉన్నాయి. దక్షిణాదిన మాస్ కా దాస్ విశ్వక్ సేన్ నటిస్తున్న ‘మెకానిక్ రాకీ’.. మళయాల నటుడు దుల్కర్ సల్మాన్ నటిస్తున్న ‘లక్కీ భాస్కర్’.. తమిళ హీరో శివ కార్తికేయన్ నటిస్తున్న ‘అమరన్’ చిత్రాలు పోటీ పడుతున్నాయి. ఈ మూడు సినిమాలు కూడా అక్టోబర్ 31న రిలీజ్‌కు రెడీ అయ్యాయి.
అటు ఉత్తరాదిన హీరో అజయ్ దేవ్ గన్ నటిస్తున్న పాపులర్ సిరీస్ మూవీ ‘సింఘం అగెయిన్’.. హర్రర్ కామెడీ సిరీస్ ‘భూల్ భులయ్యా-3’ చిత్రాలు నవంబర్ 1న రిలీజ్ అవుతున్నాయి. మరి ఇండియన్ బాక్సాఫీస్ దగ్గర ఈ ‘పాంచ్ పటాకా’లో ఏది పేలుతుందో చూడాలి అని అభిమానులు ఆసక్తిగా ఎదురుచూస్తున్నారు.