న్యాచురల్ స్టార్ నాని అభిమానులు ఎప్పుడెప్పుడు వస్తుందా అని ఆసక్తిగా ఎదురుచూస్తున్న సినిమా ‘సరిపోదా శనివారం’ వచ్చే వారం రిలీజ్‌కి రెడీగా ఉంది. ఈ సినిమా ప్రీ-రిలీజ్ ఈవెంట్‌ను తాజాగా నిర్వహించారు చిత్ర యూనిట్. ఈ వేడుకలో చిత్ర యూనిట్ మొత్తం పాల్గొని సినిమాకు సంబంధించి పలు ఆసక్తికర విషయాలను వెల్లడించారు.
ఇక ఈ ఈవెంట్‌లో హీరో నాని మాట్లాడుతూ..‘‘సరిపోదా శనివారం’ సినిమా అందరూ మెచ్చే సినిమాగా నిలుస్తుంది. మీరు నా నుంచి ఎలాంటి సినిమా కోరుతారో, అలాంటి సినిమా ఇది. ఈ సినిమాలో నటించిన ప్రతి ఒక్కరూ తమ పాత్రల్లో నటించలేదు.. జీవించేశారు. ఇక ఈ సినిమా చూసి థియేటర్ల నుంచి వచ్చేటప్పుడు నా గురించి కాదు.. ఎస్.జె.సూర్య గురించే మాట్లాడుకుంటారు. ఆయన పర్ఫార్మెన్స్ నెక్ట్స్ లెవెల్‌లో ఉంటుంది. మీకు ఖచ్చితంగా నచ్చుతుంది. ఇక ఈ సినిమా డిస్ట్రిబ్యూటర్లకు, ఎగ్జిబిటర్లకు కలిసొచ్చే కాలం వస్తే నడిచొచ్చే సినిమా వస్తుంది అనే తరహాలో ఈ మూవీ వారికి మిగిలిపోతుంది.’’ అని అన్నారు.
ఈ సినిమాలో ప్రియాంక మోహన్ హీరోయిన్‌గా నటించగా, ఎస్.జే.సూర్య విలన్ పాత్రలో నటించారు. సాయి కుమార్, అభిరామి, అదితి బాలన్, అలీ తదితరులు నటించిన ఈ సినిమాను వివేక్ ఆత్రేయ డైరెక్ట్ చేశారు.