యంగ్ హీరో నార్నె నితిన్ నటించిన యూత్‌ఫుల్ ఎంటర్‌టైనర్ ‘ఆయ్’ మూవీ ఆగస్టు 15న రిలీజ్ అయి బాక్సాఫీస్ వద్ద మంచి విజయాన్ని అందుకుంది. ఈ సినిమా థియేటర్లలోనే కాకుండా… ఓటీటీ ప్లాట్‌ఫామ్ నెట్‌ఫ్లిక్స్‌లో కూడా మంచి వ్యూస్ ను సొంతం చేసుకుంది. మొత్తానికి ఓటీటీ ఆడియెన్స్‌ ను ఆకట్టుకుంటోంది. ఈ క్రమంలో తాజాగా ప్రపంచ టెలివిజన్ ప్రీమియర్‌కు ఈ చిత్రం సిద్ధం అయింది. ఈ చిత్రం ‘జీ తెలుగు’లో నవంబర్ 17, 2024న మధ్యాహ్నం 3 గంటలకు ప్రసారం కానుంది. మరి ఈ సినిమా ఏ రేంజ్ టీఆర్పీని రాబడుతుందో చూడాలి.
పూర్తి విలేజ్ బ్యాక్ డ్రాప్‌ లో తెరకెక్కిన ఈ కామెడీ రొమాంటిక్ ఎంటర్‌టైనర్ ఫ్యామిలీ ఆడియన్స్ కి కూడా కనెక్ట్ అవుతుంది కాబట్టి, టెలివిజన్ లోనూ మంచి టీఆర్పీని సొంతం చేసుకుంటుందని అంచనా వేస్తున్నారు. ఈ మూవీలో నయన్ సారిక హీరోయిన్‌గా నటించింది. ఈ సినిమాను అంజి కె మణిపుత్ర డైరెక్ట్ చేయగా, GA2 ఆర్ట్స్ బ్యానర్‌పై బన్నీ వాస్ ప్రొడ్యూస్ చేశారు. ఆయ్ లో కసిరెడ్డి రాజ్‌కుమార్, అంకిత్ కొయ్య, వినోద్ కుమార్ ముఖ్యమైన పాత్రలు పోషించారు. ఈ చిత్రానికి అజయ్ అరసాడ బ్యాక్ గ్రౌండ్ స్కోర్ అందించగా, రామ్ మిరియాల పాటలను రూపొందించారు.