తమిళ స్టార్ హీరో విజయ్ ప్రత్యక్ష రాజకీయాల్లోకి అడుగుపెట్టారు. ‘తమిళగ వెట్రి కళగం’ అనే రాజకీయ పార్టీని ఆయన స్థాపించారు. ఇక తాజాగా ఈ పార్టీకి సంబంధించిన జెండాను విజయ్ ఆవిష్కరించారు. చెన్నైలో జరిగిన ఈ జెండా ఆవిష్కరణ కార్యక్రమానికి విజయ్ అభిమానులు పెద్ద సంఖ్యలో హాజరయ్యారు.
ఎరుపు, పసుపు రంగులో ఉన్న జెండా మధ్యలో వాగాయ్ అనే జాతి పువ్వు ఉంది. ఈ పుష్షాల‌ను విజ‌యానికి ప్ర‌తీక‌గా భావిస్తారు తమిళ ప్ర‌జ‌లు. పక్కన రెండు ఏనుగులు ఇరువైపులా ఉన్నాయి. ఈ జెండాను ఆవిష్కరించిన విజయ్, రాబోయే రోజుల్లో దేశమంతా తమ పార్టీ జెండా రెపరెపలాడుతుందని అన్నారు. ఇకపై తమిళనాడు గొప్ప మార్పును చూస్తుందని ఆయన అన్నారు. ఈ సందర్భంగా పార్టీ అధికారిక గీతాన్ని కూడా ఆయన రిలీజ్ చేశారు.
ఈ కార్యక్రమంలో విజయ్ తల్లిదండ్రులతో పాటు అభిమానులు పాల్గొన్నారు. ఇక విజయ్ రాజకీయ తెరంగేట్రం చేయడంతో అందరి చూపులు ఇప్పుడు విజయ్ పై ఉన్నాయి. రాబోయే అసెంబ్లీ ఎన్నికల్లో తమిళనాడులోని అన్నిస్థానాల్లో తమ పార్టీ సొంతంగా పోటీ చేయబోతుందని విజయ్ తెలిపారు. తమ పార్టీకి సంబంధించిన మరిన్ని వివరాలను త్వరలోనే ఓ సమావేశం ఏర్పాటు చేసి అందులో వివరిస్తామని విజయ్ తెలిపారు.