ఆనంద్ దేవరకొండ, వైష్ణవి చైతన్య హీరో హీరోయిన్స్ గా తెరకెక్కిన లేటెస్ట్ యూత్‌ఫుల్ రొమాంటిక్ డ్రామా బేబీ నేడు విడుదలై విమర్శకులు మరియు సినీ ప్రేమికుల నుండి చాలా మంచి స్పందనను పొందింది. ఇక ఈ వారాంతంలో బాక్సాఫీస్ వద్ద భారీ స్థాయి కలెక్షన్ ని బేబీ అందుకునే అవకాశం కనపడుతోంది. ఇక మరోవైపు ఈ మూవీ యొక్క నాన్-థియేట్రికల్ హక్కులు భారీ ధరకు అమ్ముడైనట్లు తెలుస్తోంది.
తాజా అప్‌డేట్‌ ప్రకారం, బేబీ నాన్-థియేట్రికల్ రైట్స్ రూ.7.50 కోట్లకు అమ్ముడయ్యాయి. ఈ డీల్‌లో సినిమా ఆడియో, శాటిలైట్ మరియు ఓటిటి హక్కులు ఉన్నాయి. నిజానికి బేబీ మొత్తం బడ్జెట్ దాదాపు రూ.10 కోట్లు. బేబీ మూవీని నైజాం మరియు ఉత్తరాంధ్ర ప్రాంతాలలో స్వంతంగా విడుదల చేశారు, మేకర్స్. కాగా వారు మిగిలిన ప్రాంతాల హక్కులను విక్రయించారు. విరాజ్ అశ్విన్ ప్రధాన పాత్రలో నటించిన బేబీ సినిమాకి సాయి రాజేష్ దర్శకత్వం వహించగా, ఎస్‌కెఎన్ నిర్మించారు. విజయ్ బుల్గానిన్ అందించిన సాంగ్స్, బీజీఎమ్ ఈ సినిమాకు ప్రధాన హైలైట్‌లలో ఒకటి.