మెగాస్టార్ చిరంజీవి ప్రస్తుతం దర్శకుడు వశిష్ఠ డైరెక్షన్లో ‘విశ్వంభర’ చిత్రంలో నటిస్తున్న సంగతి తెలిసిందే. ఈ సినిమాను పూర్తి సోషియో ఫాంటసీ మూవీగా రూపొందిస్తుండటంతో ఈ చిత్రాన్ని ఎప్పుడెప్పుడు చూద్దామా అని అభిమానులు ఆసక్తిగా చూస్తున్నారు. ఇక ఈ సినిమా నుంచి ఇప్పటికే రిలీజ్ అయిన టీజర్ ఈ సినిమాపై అంచనాలను పెంచింది.
అయితే, ఈ సినిమా రిలీజ్ కాకముందే చిరు తన నెక్స్ట్ చిత్రాన్ని కూడా అనౌన్స్ చేశారు. యంగ్ డైరెక్టర్ శ్రీకాంత్ ఓదెల దర్శకత్వంలో చిరు తన నెక్స్ట్ చిత్రాన్ని తెరకెక్కించనున్నాడు. ఈ సినిమాను శ్రీకాంత్ పూర్తి వైవిధ్యమైన కథతో తెరకెక్కించబోతున్నాడని.. ఈ సినిమాలో చిరంజీవిని సరికొత్తగా చూపెట్టబోతున్నాడని చిత్ర యూనిట్ తెలిపింది. కాగా, ఈ సినిమా కోసం చిరు తన రెమ్యునరేషన్ను భారీగా పెంచినట్లుగా తెలుస్తోంది.
ఇప్పటికే టాలీవుడ్ హీరోలు చాలా వరకు తమ రెమ్యునరేషన్ను భారీగా పెంచిన సంగతి తెలిసిందే. అయితే సీనియర్ హీరోలు చిరంజీవి, బాలకృష్ణ, నాగార్జున, వెంకటేష్ మాత్రం తమ రెమ్యునరేషన్ను పెంచడం లేదని వార్తలు వినిపించాయి. కానీ, ఇప్పుడు సీనియర్ హీరోల్లో చిరంజీవి శ్రీకాంత్ ఓదెల మూవీ కోసం ఏకంగా రూ.75 కోట్ల మేర రెమ్యునరేషన్ను డిమాండ్ చేయగా, చిత్ర యూనిట్ ఈ మొత్తానికి ఓకే చెప్పినట్లు తెలుస్తోంది. ఇక ఈ సినిమాను వచ్చే సంవత్సరం ప్రారంభించేందుకు చిత్ర యూనిట్ ప్లాన్ చేస్తున్నట్లు తెలుస్తోంది.