తమిళ చిత్ర పరిశ్రమలో విషాదం చోటు చేసుకుంది. ప్రముఖ తమిళ నటుడు ఢిల్లీ గణేశ్ కన్నుమూశారు. ఢిల్లీ గణేశ్ వయసు 80 సంవత్సరాలు. పెరిగిన వయసు రీత్యా ఆయన కొంతకాలంగా అనారోగ్య సమస్యలతో ఇబ్బంది పడుతున్నారు. ఈ క్రమంలోనే ఆయన తన ఇంట్లోనే అర్ధరాత్రి తుదిశ్వాస విడిచారు. ఢిల్లీ గణేశ్ మరణం పట్ల పలువురు సినీ ప్రముఖులు, అభిమానులు సంతాపం తెలుపుతూ.. ఢిల్లీ గణేశ్ ఆత్మకు శాంతి కలగాలని ప్రార్థించారు.
ఢిల్లీ గణేశ్ మంచి నటుడు. ఆయన తన కెరీర్ లో ఎన్నో విభిన్న పాత్రల్లో నటించారు. ఇండియన్ 2, కాంచన 3, అభిమన్యుడు వంటి అనేక సినిమాల్లో నటించి ఇటు తెలుగు ప్రేక్షకులనూ అలరించారు. ఆయన మరణం నిజంగా గుండెల్ని పిండేస్తుంది అంటూ ఢిల్లీ గణేశ్ సన్నిహితులు తమ బాధను వ్యక్తం చేస్తున్నారు. మా 123తెలుగు.కామ్ తరఫున ఢిల్లీ గణేశ్ మృతి పట్ల తీవ్ర సంతాపాన్ని వ్యక్తం చేస్తూ, శోహార్తులైన వారి కుటుంబ సభ్యులకు ప్రగాఢ సానుభూతిని తెలియజేస్తున్నాము.
