ఐకాన్ స్టార్ అల్లు అర్జున్ నటిస్తున్న ప్రెస్టీజియస్ మూవీ పుష్ప-2 కోసం కేవలం తెలుగు ఆడియన్స్ మాత్రమే కాకుండా యావత్ పాన్ ఇండియా ప్రేక్షకులు ఎంతో ఆసక్తిగా ఎదురుచూస్తున్నారు. ఈ సినిమాను క్రియేటివ్ డైరెక్టర్ సుకుమార్ తెరకెక్కిస్తుండగా మరోసారి ఇండియన్ బాక్సాఫీస్‌ను షేక్ చేసేందుకు పుష్పరాజ్ రెడీ అవుతున్నాడు. ఇక ఈ సినిమాకు సంబంధించి ప్రస్తుతం క్లైమాక్స్ షూటింగ్ శరవేగంగా జరుగుతున్న సంగతి తెలిసిందే.

తాజాగా, ఈ సినిమా నుంచి ఓ సాలిడ్ అప్డేట్‌ను ఇచ్చారు మేకర్స్. పుష్ప-1 సినిమాలో పోలీస్ ఆఫీసర్ భన్వర్ సింగ్ షెకావత్ పాత్రలో మళయాల నటుడు ఫహాద్ ఫాజిల్ అద్భుతమైన పర్ఫార్మెన్స్ ఇచ్చిన సంగతి తెలిసిందే. పుష్ప పాత్రకు ధీటుగా సుకుమార్ ఈ పాత్రను డిజైన్ చేశాడు. ఇక పుష్ప-2 లో కూడా ఈ పాత్ర ఇంతే పవర్‌ఫుల్‌గా ఉండనుంది. కాగా, నేడు ఫహాద్ ఫాజిల్ పుట్టినరోజు సందర్భంగా పుష్ప-2 నుంచి ఆయన ఫస్ట్ లుక్ పోస్టర్‌ను రిలీజ్ చేశారు.

పోలీస్ డ్రెస్‌లో కాకుండా లుంగీ కట్టుకుని మాస్ లుక్‌తో ఎంట్రీ ఇచ్చాడు భన్వర్ సింగ్ షెకావత్. ఓ చేతిలో గొడ్డలి, మరో చేతిలో గన్ పట్టుకొని స్మగ్లర్లపై విరుచుకు పడుతున్నట్లుగా ఆయన లుక్ కనిపిస్తుంది. మొత్తానికి పుష్ప-2 మూవీలో భన్వర్ సింగ్ షెకావత్ తన రివెంజ్ ఏ రేంజ్‌లో తీర్చుకుంటాడో అనే ఆసక్తిని మేకర్స్ ఈ పోస్టర్‌తో క్రియేట్ చేశారు. రష్మిక మందన్న హీరోయిన్‌గా నటిస్తోన్న ఈ సినిమాకు దేవిశ్రీ ప్రసాద్ సంగీతం అందిస్తున్నాడు. మైత్రీ మూవీ మేకర్స్ ఈ చిత్రాన్ని ప్రతిష్టాత్మకంగా ప్రొడ్యూస్ చేస్తున్నారు.