మాస్ డైరెక్టర్ హరీష్ శంకర్ ప్రస్తుతం తన తదుపరి విడుదల మిస్టర్ బచ్చన్ పోస్ట్ ప్రొడక్షన్ పనుల్లో బిజీగా ఉన్నాడు. రవితేజ మరియు భాగ్యశ్రీ బోర్సే ప్రధాన పాత్రలలో నటించిన ఈ చిత్రం అజయ్ దేవగన్ సూపర్ హిట్ రైడ్ యొక్క అధికారిక రీమేక్. ఇది కాకుండా పవర్ స్టార్ పవన్ కళ్యాణ్ తో ఉస్తాద్ భగత్ సింగ్ అనే సినిమా కూడా హరీష్ చేతిలో ఉంది. మిస్టర్ బచ్చన్ ప్రమోషన్స్ సందర్భంగా హరీష్, పవన్ తో తన సినిమా గురించి పెద్ద ప్రకటన చేసాడు.

హరీష్ శంకర్ మాట్లాడుతూ, పవన్ కళ్యాణ్ గారి అభిమానులకు ఉస్తాద్ భగత్ సింగ్ చిరకాల జ్ఞాపకాలను అందజేస్తుంది. క్యాసెట్లు, డీవీడీలు ఎలా భద్రపరుస్తామో అలాగే ఈ సినిమా కూడా అభిమానుల హృదయాల్లో స్థానం పొందుతుంది. ఉస్తాద్ భగత్ సింగ్ అభిమానులకు ఎప్పటికీ ప్రత్యేక చిత్రంగా నిలిచిపోతుంది. పవన్ కళ్యాణ్ గారి సినిమా నుండి ప్రేక్షకులు ఆశించే అన్ని అంశాలు ఇందులో ఉంటాయి అని అన్నారు. శ్రీలీల ఇందులో కథానాయికగా నటిస్తుంది. నవీన్ యెర్నేని, రవిశంకర్‌లు భారీ చిత్రాన్ని నిర్మిస్తున్నారు. దర్శకుడు దశరధ్ స్క్రీన్ ప్లే రాస్తున్నారు. అశుతోష్ రానా, గౌతమి, నాగ మహేష్, టెంపర్ వంశీ, కేజీఎఫ్ ఫేమ్ అవినాష్ ఇతర కీలక పాత్రలు పోషిస్తున్నారు. దేవి శ్రీ ప్రసాద్ స్వరాలు సమకూరుస్తున్నారు.