‘ప్రేయసి రావే’ సినిమాతో మెప్పించి ఆ తర్వాత ‘హనుమంతు’, ‘అయోధ్య రామయ్య’, ‘ఆలస్యం అమృతం’ తదితర సినిమాలకు దర్శకత్వం వహించిన దర్శకుడు చంద్ర మహేష్, తాజాగా రెడ్ అలర్ట్ పేరుతో ఓ కామెడీ డ్రామాతో మనముందుకు వస్తున్నారు. పి.వి.శ్రీరామ్ రెడ్డి నిర్మాణంలో రూపొందిన ఈ సినిమా అన్ని కార్యక్రమాలనూ పూర్తి చేసుకొని రేపు (నవంబర్ 6న) ప్రేక్షకుల ముందుకు రానుంది. ఈ సందర్భంగా దర్శకుడు చంద్ర మహేష్‌తో జరిపిన ఇంటర్వ్యూ విశేషాలు..
ప్రశ్న) ‘రెడ్ అలర్ట్’ సినిమా ఇంత ఆలస్యంగా విడుదలవుతోంది. కారణం?
స) రెడ్ అలర్ట్ సినిమాను మేము నాలుగో భాషల్లో నిర్మించడంతో సాధారణంగానే అనుకోని పరిస్థితుల వల్ల లేట్ అయింది. ముఖ్యంగా పోస్ట్ ప్రొడక్షన్ పనులకు చాలా సమయం పట్టడంతో సినిమా ఆలస్యమైంది. ఏది ఏమైనా ఓ సరికొత్త కథాంశంతో వస్తోన్న ఈ సినిమా తప్పక అందరినీ ఆకట్టుకుంటుందన్న నమ్మకం ఉంది.
ప్రశ్న) రెడ్ అలర్ట్ సినిమా ఎలా ఉండబోతోంది?
స) ఒక టెర్రరిస్టు కార్యకలాపంలో అనుకోకుండా కొందరు యువకులు ఇరుక్కుంటే వాళ్ళకు ఎలాంటి పరిస్థితులు ఎదురయ్యాయనే అంశం చుట్టూ ఈ సినిమా నడుస్తుంది. చెప్పాలంటే.. ఇలాంటి సీరియస్ కథాంశాన్ని ఈ సినిమాలో చెప్పినంత ఫన్‌తో ఇప్పటివరకూ చెప్పలేదు. ఈ పాయింట్ ప్రేక్షకుడికి బాగా కనెక్ట్ అవుతుందన్న నమ్మకం ఉంది.
ప్రశ్న) ఈ సినిమాను నాలుగు ప్రధాన భాషల్లో తెరకెక్కించాలన్న ఆలోచన ఎవరిది?
స) మొదట్లో ఈ సినిమాకు ఒక్క తెలుగులో మాత్రమే తెరకెక్కించాలన్న ఆలోచనే ఉండేది. అయితే ఈ సినిమా కాన్సెప్ట్ అన్ని భాషల ప్రేక్షకులూ కనెక్ట్ చేసుకునేది కావడంతో నిర్మాత శ్రీరామ్ రెడ్డి ఈ సినిమాను తెలుగుతో పాటు తమిళం, కన్నడ, మళయాలం భాషల్లోనూ రూపొందించాలన్న ఆలోచన చేశారు.
ప్రశ్న) రెడ్ అలర్ట్ ప్రధాన తారాగణం గురించి చెప్పండి?
స) ఈ సినిమా నిర్మాత శ్రీరామ్ రెడ్డి కుమారుడు సురేష్ సినిమాలోని మేజర్ లీడ్స్‌లోని ఓ పాత్రను చేశాడు. సుమన్, భాగ్యరాజా, సునీత చౌదరి, అలీ తదితరులు ఇతర ప్రధాన పాత్రల్లో నటించారు.
ప్రశ్న) ఇప్పటివరకూ దర్శకుడిగా ఇండస్ట్రీలో మీ ప్రయాణం ఎలా ఉంది?
స) నా కెరీర్లో ఎత్తు పల్లాలు రెండూ ఉన్నాయి. దర్శకుడిగా ఎప్పుడూ సరికొత్త కథలను, సినిమాలను అందిస్తూ ఉండాలన్నదే నా కోరిక. భవిష్యత్‌లోనూ ఇదే పంథాను కొనసాగిస్తా.
ప్రశ్న) మీ మొదటి సినిమా ప్రేయసి రావే మంచి హిట్. ఆ సినిమా అవకాశం ఎలా వచ్చింది?
స) రామానాయుడు గారి ప్రోద్బలంతోనే దర్శకుడినయ్యా. సురేష్ ప్రొడక్షన్స్‌లో అసిస్టెంట్ డైరెక్టర్‌గా పనిచేస్తున్న రోజుల్నుంచే ఆయన నన్ను ఎంతగానో ప్రోత్సాహించేవారు. ఆయనిచ్చిన ప్రోత్సాహంతోనే ప్రేయసి రావే సినిమాతో దర్శకుడినయ్యా. ఆ సినిమా పెద్ద విజయం సాధిండమే కాకుండా ఇండస్ట్రీలో చిరంజీవి లాంటి స్టార్ హీరోల నుంచి ప్రశంసలను తెచ్చిపెట్టింది.