యంగ్ హీరో నిఖిల్ సిద్ధార్థ్ కెరీర్‌లో ‘కార్తికేయ-2’ ఎలాంటి సక్సెస్ అందుకుందో అందరికీ తెలిసిందే. పాన్ ఇండియా మూవీగా ఈ సినిమా రావడంతో పాటు దర్శకుడు చందు మొండేటి ఈ సినిమాను తెరకెక్కించిన తీరు అద్భుతంగా ఉండటంతో ప్రేక్షకులు ఈ సినిమాకు సాలిడ్ రెస్పాన్స్ అందించారు. ఇక ఈ సినిమా ఇప్పుడు ఓ అరుదైన ఘనతను సాధించింది.
కేంద్ర ప్రభుత్వంచే 70వ జాతీయ ఫిలిం అవార్డుల్లో 2022 సంవత్సరానికి గాను ఉత్తమ తెలుగు చిత్రంగా ‘కార్తికేయ-2’ నిలిచింది. శ్రీకృష్ణుడి ఇతివృత్తంతో తెరకెక్కిన ఈ సినిమా బాక్సాఫీస్ దగ్గర కళ్లు చెదిరే వసూళ్లు రాబట్టింది. దీనికి తోడు ఈ సినిమాలోని నటీనటుల పర్ఫార్మెన్స్, చక్కటి సంగీతం ప్రేక్షకులను అమితంగా ఆకట్టుకుంది. నార్త్‌లోనూ ఈ సినిమా సూపర్ సక్సెస్‌గా నిలిచి రికార్డు క్రియేట్ చేసింది.
ఇక ఈ సినిమాను చందు మొండేటి డైరెక్ట్ చేయగా అభిషేక్ అగర్వాల్ ఆర్ట్స్ బ్యానర్‌పై అభిషేక్ అగర్వాల్‌తో పాటు పీపుల్ మీడియా ఫ్యాక్టరీ బ్యానర్‌పై టిజి.విశ్వ ప్రసాద్‌లు సంయుక్తంగా ప్రొడ్యూస్ చేశారు. అనుపమ పరమేశ్వరన్, శ్రీనివాస్ రెడ్డి, అనుపమ్ ఖేర్ తదితరులు ఈ సినిమాలో ఇతర ముఖ్య పాత్రల్లో నటించారు.
