ప్ర‌ముఖ ద‌ర్శ‌కుడు భాగ్య‌రాజ్ త‌న‌యుడు శంత‌న్ భాగ్య‌రాజ్, సృష్టి డాంగే జంట‌గా త‌మిళంలో రూపొందిన చిత్రం `ముప్ప‌రి మ‌నమ్‌`. త‌మిళంలో ఘ‌న విజ‌యం సాధించిన ఈ చిత్రం రైట్స్ ఫ్యాన్సీ రేటుతో ద‌క్కించుకున్న భువ‌న్ కుమార్ అల్లం, ధను క్రియేష‌న్స్ బేన‌ర్ పై `ల‌వ్ గేమ్` పేరుతో తెలుగులోకి అనువ‌దిస్తున్నారు. ఆది రూప‌న్ ద‌ర్శ‌కుడు. ఇటీవ‌లే సెన్సార్ కార్య‌క్ర‌మాలు పూర్తి చేసుకున్న ఈ చిత్రాన్ని మార్చి 8న గ్రాండ్ గా విడుద‌ల చేయ‌నున్నారు. ఈ సంద‌ర్భంగా ఈ సినిమాకు సంబంధించిన ప్రీ రిలీజ్ మార్చి 2న హైద‌రాబాద్‌లో జ‌రిపారు.

ఈ కార్య‌క్ర‌మానికి ముఖ్య అతిథులుగా విచ్చేసిన “అనిల్‌ రావిపూడి మాట్లాడుతూ… “భాగ్య‌రాజ్‌గారు నా `ఎఫ్‌2` చిత్రం చూసి ప్ర‌తీ డైలాగ్ గుర్తుంచుకొని నాకు ఫోన్ చేసి మ‌రీ ప్ర‌శంసించారు. కుటుంబ క‌థా చిత్రాలు చేయ‌డంలో భాగ్య‌రాజ్‌ గారి త‌ర్వాతే ఎవ‌రైనా. నేను ఆయ‌న‌కు పెద్ద ఫ్యాన్ ని. ఆయ‌న‌తో నేను ఈ ఫంక్ష‌న్ కు హాజ‌రుకావ‌డం అదృష్టంగా భావిస్తున్నా“అని అన్నారు.

ప్రొడ్యూస‌ర్ భువ‌న్ కుమార్ అల్లం మాట్లాడుతూ… “ నేను 20 సినిమాలు చూశాను. అందులో ఈ సినిమా బాగా న‌చ్చింది. వెంట‌నే రైట‌ర్ వెన్నెల‌కంటిగారిని చూడ‌మ‌న్నా. ఆయ‌న ఈ సినిమాని ఎంతో మెచ్చుకున్నారు. మీరు ఈ సినిమాకి నాకు డ‌బ్బులు ఇవ్వ‌క‌పోయినా ప‌ర్వాలేదు నేను వ‌ర్క్ చేస్తాను అన్నారు. దాంతో నాకు ఇంకా కాన్ఫిడెన్స్ పెరిగింది. ఈ సినిమా త‌ప్ప‌కుండా తెలుగులో కూడా పెద్ద హిట్ అవుతుంద‌ని న‌మ్ముతున్నా“ అన్నారు.

న‌టుడు భాగ్య‌రాజ్ మాట్లాడుతూ…“మా అబ్బాయి న‌టించిన త‌మిళ చిత్రం తెలుగులో `ల‌వ్ గేమ్` పేరుతో తెలుగులో కి విడుద‌ల‌వుతోంది. డెఫ్‌నెట్‌గా ఇక్క‌డ కూడా హిట్ అవుతుంద‌ని న‌మ్ముతున్నా. నా డబ్బింగ్ చిత్రాల‌న్నీ ఇక్క‌డ సూప‌ర్‌ హిట్లు అయ్యాయి. మరి ఇప్పుడు ఈ చిత్రాన్ని ప్రేక్ష‌కులు రిసీవ్ చేసుకుంటార‌ని నమ్ముతున్నా“ అన్నారు.

న‌టి ర‌మ్య‌కృష్ణ మాట్లాడుతూ… “భాగ్య‌రాజ్ గారు ఇండియాలోనే జీనియ‌స్ డైరెక్ట‌ర్‌. ఆది రూప‌న్ ప్ర‌స్తుతం ఉన్న యంగ్ జ‌న‌రేష‌న్‌లో చాలా టాలెంటెడ్ డైర‌క్ట‌ర్ . ఈ చిత్రం తెలుగులో కూడా పెద్ద హిట్ కావాల‌ని కోరుకుంటున్నాను“ అన్నారు.

హీరో రాజశేఖ‌ర్ మాట్లాడుతూ… “భాగ్య‌రాజ్‌గారు చాలా మంచి స్క్రీన్ ప్లే డైరెక్ట‌ర్‌. వాళ్ళ అబ్బాయి అంటే ప్ర‌త్యేకించి చెప్ప‌క్క‌ర్లేదు . వారి స్థాయిలో క‌చ్చితంగా గొప్ప పేరు తెచ్చుకుంటాడు. త‌ప్ప‌కుండా` ల‌వ్‌గేమ్` తెలుగులో పెద్ద హిట్ అవుతుంది“ అన్నారు.