మెగా పవర్ స్టార్ రామ్ చరణ్ మార్చి 27న పుట్టినరోజును జరుపుకోనున్నారు. ఆరోజున సెలబ్రేషన్స్ గట్టిగా ఉండాలంటున్నారు ఫాన్స్. ముఖ్యంగా చరణ్ నటిస్తున్న రెండు సినిమాలు ‘ఆర్ఆర్ఆర్, ఆచార్య’ నుండి అప్డేట్స్ తప్పకుండా ఉండాల్సిందే అంటున్నారు. రాజమౌళి, కొరటాల శివలు కూడ చెర్రీ పుట్టినరోజునాడు చరణ్ పాత్రల గురించిన అప్డేట్ ఇవ్వాలనే ఉదేశ్యంలోనే ఉన్నారు. ఇక అభిమానులైతే చరణ్ పుట్టినరోజు వేడుకలకు తమ సొంత ఏర్పాట్లలో ఉన్నారు.
ఆ ఏర్పాట్లలో భాగంగానే మార్చి 27న ‘మగధీర’ చిత్రాన్ని స్పెషల్ వేయాలని నిర్ణయించుకున్నారు. ఆర్టీసీ క్రాస్ రోడ్స్ నందు గల సంధ్య 70 ఎం.ఎం థియేటర్లో రాత్రి 9: 30 గంటలకు అభిమానుల కోసం స్పెషల్ స్క్రీనింగ్ వేయనున్నారు. దీనికి సంబంధించిన టికెట్లు ఆన్ లైన్లో అందుబాటులో ఉంచుతారట. చరణ్ కెరీర్లో ‘మగధీర’ ఏ స్థాయి సినిమానో ప్రత్యేకించి చెప్పనక్కర్లేదు. ఇండస్ట్రీ హిట్ అనే పదం మొదలైంది ఆ సినిమాతోనే. డెబ్యూ సినిమా ‘చిరుత’ తర్వాత చేసిన రెండవ సినిమా ఇది. ఆ సినిమా సాధించిన విజయంతో చరణ్ స్టార్ హీరో అయ్యాడు. తండ్రికి తగ్గ తనయుడనే పేరు తెచ్చుకున్నాడు. రాజమౌళి దర్శకత్వంలో తెరకెక్కిన ఈ సినిమాను గీతా ఆర్ట్స్ సంస్థ నిర్మించింది.
