అడివి శేష్ హీరోగా తెరకెక్కుతున్న చిత్రం ‘మేజర్’. సూపర్ స్టార్ మహేష్ బాబు నిర్మాణంలో ఈ సినిమా రూపొందుతోంది. శశి కిరణ్ తిక్క ఈ సినిమాకు దర్శకుడు. జూలై 2న సినిమా విడుదలకానుంది. చిత్ర బృందం పనుల్లో బిజీగా ఉంది. ఇటీవలే కొన్ని అప్డేట్స్ కూడ ఇచ్చి పాజిటివ్ బజ్ తెచ్చుకున్నారు. అంతా బాగానే జరుగుతున్న తరుణంలో ఒక విషాద ఘటన చోటు చేసుకుంది. దర్శకుడు శశి కిరణ్ తిక్క తండ్రి తిక్క సూర్యనారాయణగారు కన్నుమూశారు.
నిన్న రాత్రి ఆయన మరణించారు. ఈ విషయాన్ని అడివి శేష్ స్వయంగా తెలిపారు. మా దర్శకుడు శశి కిరణ్ తండ్రి కన్నుమూయడం ‘మేజర్’ టీమ్ మొత్తాన్ని విషాదంలోకి నెట్టిందని చెప్పుకొచ్చారు. ఈ సంగతి తెలిసి పలువురు సినీ ప్రముఖులు శశి కిరణ్ తిక్క కుటుంబానికి ప్రగాఢ సానుభూతిని తెలుపుతున్నారు. శశి కిరణ్ తన మొదటి చిత్రం ‘గూఢచారి’తో తెలుగు పరిశ్రమకు దర్శకుడిగా పరిచయమయ్యాడు. 2018లో వచ్చిన ఆ చిత్రం మంచి విజయాన్ని సాధించి శశి కిరణ్ తిక్కకు మంచి పేరును తెచ్చిపెట్టింది. అతని టాలెంట్ చూసే మహేష్ బాబు ‘మేజర్’ అవకాశాన్ని ఇచ్చారు.
