మాలీవుడ్ మెగాస్టార్ మమ్ముట్టి చివరిసారిగా యాక్షన్ డ్రామా టర్బోలో కనిపించారు. విడుదలకు ముందు భారీ హైప్ ఉన్న ఈ చిత్రం, రిలీజ్ తర్వాత విమర్శకుల నుండి మిశ్రమ సమీక్షలను అందుకుంది. సమీక్షలు అంతగా ప్రోత్సాహకరంగా లేకపోయినా, కమర్షియల్ ఎంటర్టైనర్ టోటల్ రన్ లో 70 కోట్ల రూపాయల వసూళ్లను రాబట్టింది. గతంలో పులిమురుగన్, పోక్కిరి రాజా వంటి హిట్ చిత్రాలకు దర్శకత్వం వహించిన వైశాఖ్ టర్బో చిత్రానికి దర్శకుడు. టర్బో ఆగస్ట్ 9 నుండి స్ట్రీమింగ్ కోసం అందుబాటులో ఉంటుందని మొదట్లో ప్రకటించారు. అయితే ఈ సినిమా ఇప్పటికే డిజిటల్‌గా ఎంట్రీ ఇచ్చింది.
మమ్ముట్టి నటించిన ఈ చిత్రం ఇప్పుడు మలయాళం, తెలుగు, హిందీ, తమిళం, కన్నడ, బెంగాలీ మరియు మరాఠీ భాషల్లో సోనీ LIV ప్లాట్‌ ఫామ్ లో ప్రసారం అవుతోంది. విమర్శకుల ప్రశంసలు పొందిన ఈ చిత్రంలో నటుడు రాజ్ బి శెట్టి ప్రతినాయకుడిగా నటించారు. ప్రముఖ తెలుగు హాస్యనటుడు సునీల్ కీలక పాత్ర పోషించారు. అంజనా జయప్రకాష్, శబరీష్ వర్మ, దిలీష్ పోతన్ మరియు బిందు పనికర్ కూడా ఈ చిత్రంలో భాగం. మమ్ముట్టి తన హోమ్ బ్యానర్ మమ్ముట్టి కంపనీపై టర్బోను నిర్మించారు.