గ్లోబల్ స్టార్ రామ్ చరణ్ తన కెరీర్‌లోని 16వ చిత్రాన్ని ‘ఉప్పెన’ చిత్ర దర్శకుడు బుచ్చిబాబు సానాతో చేయబోతున్న సంగతి తెలిసిందే. ఈ సినిమాను ఇప్పటికే అధికారికంగా లాంచ్ చేయగా, నేడు(నవంబర్ 22) ఈ చిత్ర రెగ్యులర్ షూటింగ్ కూడా ప్రారంభించారు. ఇక ఈ సినిమాను స్పోర్ట్స్ డ్రామా మూవీగా చిత్ర యూనిట్ రూపొందించబోతుందని వార్తలు వస్తున్నాయి. అయితే, ఈ సినిమాలోని క్యాస్టింగ్‌పై కూడా సినీ సర్కిల్స్‌లో పలు వార్తలు వినిపిస్తున్నాయి.
ఇప్పటికే ఈ సినిమాలో కన్నడ సూపర్ స్టార్ శివ రాజ్‌కుమార్ నటిస్తున్నట్లు మేకర్స్ వెల్లడించారు. తాజాగా ఈ మూవీలో వర్సటైల్ యాక్టర్ జగపతి బాబు కూడా జాయిన్ అవుతున్నట్లు ప్రకటించారు. అయితే, ఇప్పుడు మరో క్రేజీ యాక్టర్ కూడా ఈ సినిమాలో నటించబోతున్నాడనే టాక్ వినిపిస్తోంది. బాలీవుడ్‌లో తెరకెక్కిన బ్లాక్‌బస్టర్ వెబ్ సిరీస్ ‘మీర్జాపూర్’ గురించి అందరికీ తెలిసిందే. అందులో మున్నా భయ్యా పాత్రకు ఎలాంటి క్రేజ్ దక్కిందో మనం చూశాం. దేశవ్యాప్తంగా మున్నా భయ్యా పాత్రకు మంచి అప్లాజ్ దక్కింది. ఇక ఈ పాత్రలో నటించిన దివ్యేందు శర్మకు సాలిడ్ గుర్తింపు రావడంతో వరుసగా సినిమాలు చేస్తున్నాడు.
కాగా, ఇప్పుడు ఈ క్రేజీ యాక్టర్ ‘RC16’లో కూడా ఓ కీలక పాత్రలో నటించబోతున్నట్లు సినీ సర్కిల్స్‌లో జోరుగా వార్తలు వినిపిస్తున్నాయి. మరి ఈ వార్తలో ఎంతవరకు నిజం ఉందనే విషయం తెలియాలంటే చిత్ర యూనిట్ అధికారికంగా ప్రకటించే వరకు వెయిట్ చేయాల్సిందే. ఇక ఈ సినిమాలో అందాల భామ జాన్వీ కపూర్ హీరోయిన్‌గా నటిస్తోంది.