నారా రోహిత్ రాబోయే చిత్రం ‘సోలో’ ఆడియో విడుదల హైదరాబాద్ శిల్పారామంలో జరిగింది. అక్టోబర్ 22 రాత్రి ఉల్లాస భరిత వాతావరణంలో జరిగిన ఈ కార్యక్రమానికి పలువురు ప్రముఖులు హాజరయ్యారు. వీరిలో టిడిపి అధినేత చంద్రబాబు నాయుడు, శర్వానంద్, అల్లరి నరేష్, నారా రోహిత్, నిషా అగర్వాల్, పరశురాం, వంశీ కృష్ణ శ్రీనివాస్, వంశీ పైడిపల్లి, రామ్ జోగయ్య శాస్త్రి, కృష్ణ చైతన్య తదితరులు ఉన్నారు. నారా రోహిత్ చిన్నాన్న మరియూ టిడిపి చీఫ్ చంద్రబాబు నాయుడు ఆడియో సిడి ని ఆవిష్కరించారు. అల్లరి నరేష్, శర్వానంద్ ఈ మూవీ ట్రైలర్స్ ను విడుదల చేసారు.
ఈ సందర్భంగా చంద్రబాబు రోహిత్ పై ప్రసంసల వర్షం కురిపించారు. ‘బాణం’ చిత్రంలో రోహిత్ నటన అద్భుతంగా ఉందన్నారు. ఏ తరహా పాత్రల్లోనైనా అతను జీవించగలడన్న నమ్మకాన్ని కలిగించాడన్నారు. రోహిత్ సినీ కెరీర్ ఉజ్వలంగా ఉండాలని బాబు ఆకాంక్షించారు. అంతేకాదు, గత కొన్ని సంవత్సరాలుగా తెలుగు సినిమా మార్కెట్ బాగా పెరిగిందని తెలిపారు. అల్లరి నరేష్, శర్వానంద్ బాక్స్ ఆఫీసు వద్ద ఈ సినిమా సూపర్ హిట్ కావాలని అభిలషించారు. తొలి చిత్రం ‘బాణం’ లో రోహిత్ నటనను వీరిరువురూ ప్రశంసించారు. పూర్తి స్వేచ్ఛనివ్వటంవల్లే మంచి పాటలు రాయగలిగానని, ఈ పాటలు నాకు చాలా సంతోషాన్ని ఇచ్చాయని గీత రచయిత రామ్ జోగయ్య శాస్త్రి అభిప్రాయపడ్డారు.
కాగా, ‘సోలో’ చిత్రంలో నారా రోహిత్, నిషా అగర్వాల్ ప్రధాన పాత్రలు పోషించారు. దర్శకుడు పరశురాం కు ఇది మూడోచిత్రం. గతంలో ‘యువత’, ‘ఆంజనేయులు’ సినిమాలకు ఈన దర్శకత్వ బాధ్యతలు నిర్వర్తించారు. ఎస్వికె బ్యానర్ పై వంశీ కృష్ణ శ్రీనివాస్ ఈ చిత్రాన్ని నిర్మిస్తున్నారు. మణి శర్మ సంగీతం. ఈ మూవీ నవంబర్ ద్వితీయార్థం లో తెరలను తాకుతుందని భావిస్తున్నారు
