షాక్ లివ్వటంలో రామ్ గోపాల్ వర్మకు చిత్ర పరిశ్రమలో ఎవ్వరూ సరిరారు. తానూ ఈ ప్రాజెక్ట్ చేపట్టినా దానిపై ఒక అలజడిని రేకెత్తించి పబ్లిసిటీ కొట్టేయటం ఆయనకు వెన్నతో పెట్టిన విద్య. అయితే, ఈసారి అతను ట్విట్టర్ లో పోస్ట్ చేసిన వార్త సినిమా పరిశ్రమనే కాదు, అటు మెగాస్టార్ చిరంజీవి అభిమానులను నిశ్చేష్టులను చేసింది.
ఆ వార్త ఏమిటంటే.. చిరంజీవికి స్టార్ డం తీసుకు వచ్చిన బ్లాక్ బస్టర్ మూవీ ‘ఖైదీ’ చిత్రం రీమేక్ గురించి. పూరీ జగన్నాథ్ ‘ఖైదీ’ చిత్రాన్ని ప్రిన్స్ మహేష్ బాబు హీరోగా రీమేక్ చేసేందుకు ప్రణాళిక రూపొందిస్తున్నారంటూ సంచలన ప్రకటన చేసి అందరి దృష్టిని ఆకర్షించాడు ‘రాము’. అప్పుడు చిరంజీవిని కోదండరామిరెడ్డి చూపించిన దానికంటే పూరీ మహేష్ ను బెటర్ గా చూపించబోతున్నరంటూ చెప్పుకొచ్చాడు.
సాధారణంగా, ఒక టాప్ హీరో ల్యాండ్ మార్క్ మూవీ ని అతని కుమారుడో లేక అంతటి దగ్గరి వరసుడి ద్వారానో రీమేక్ చేయటం చూస్తాం. అయితే ఇది అందుకు పూర్తి విరుద్దం. చిరంజీవి అభిమానులు ఎందుకు షాక్ అయ్యారంటే ఈ చిత్రాన్ని రామ్ చరణ్ తేజ్ లేదా అల్లు అర్జున్ లతో తీయక పోవటమే..
మంచిది.. ఇలాంటి సంచలనాత్మక ప్రకటనలు విసరటం రామ్ గోపాల్ వర్మకు అలవాటే, నిజానికి ‘ఖైదీ’ చిత్రాన్ని పూరీ జగన్, మహేష్ బాబు తో తీస్తున్నారా లేదా అనేమాట అటుంచితే, ఈ ప్రాజక్టు పై సర్వత్రా ఆసక్తి మాత్రం ఏర్పడింది.
