రానా- జెనీలియా జంటగా నటిస్తోన్న రాబోయే చిత్రం నా ఇష్టం. ప్రస్తుతం ఈ మూవీ హైదరాబాద్ లో షూటింగ్ జరుపుకుంటోంది. చిత్రాన్ని ఈ సంవత్సర ఆరంభంలో ప్రారంభించినప్పటికీ, షూటింగ్ షెడ్యూల్ మధ్య విపరీతమైన గ్యాప్ రావటంతో చిత్రీకరణకు ఎక్కువ సమయం పట్టింది. అయితే, అనుకున్న సమయానికి పూర్తి చేయాలన్న ఉద్దేశ్యంతో చిత్ర యూనిట్ ఓవర్ టైం పనిచేస్తోంది. ప్రతీ రోజువిడిచిరోజు రానా, జెనీలియా డబుల్ షిఫ్ట్ పనిచేస్తున్నారు. వీరు తెల్లవారుజాము దాదాపు 4 గంటల వరకు షూటింగ్ లో పాల్గొంటున్నట్టు తెలుస్తోంది. ప్రస్తుతం రానా పై కొన్ని యాక్షన్ సీక్వెన్స్ చిత్రీకరణ జరుగుతున్నట్టు సమాచారం.
రానా మొదటి సరిగా ఈ చిత్రంలో పూర్తి షేవింగ్ తో స్పోర్టివ్ గా కనిపించబోతున్నారు. ప్రకాష్ తోలేటి ఈ చిత్రం తో దర్శకునిగా పరిచయమవుతున్నారు. పరచూరి కిరీటి ఈ సినిమా నిర్మాత. చక్రి సంగీతం కంపోజ్ చేస్తున్నారు. జీవితంలో విభిన్న సిద్ధాంతాలు కలిగిన ఒక అమ్మాయి – అబ్బాయి మధ్య నడిచే ప్రేమ కథ గా ఈ సినిమా తెరకెక్కబోతోంది.
