మాస్ మహారాజా రవితేజ, సక్సెస్‌ఫుల్ డైరెక్టర్ హరీష్ శంకర్ కాంబినేషన్‌లో తెరకెక్కిన క్రేజీ మూవీ ‘మిస్టర్ బచ్చన్’. పూర్తి మాస్ అంశాలతో తెరకెక్కిన ఈ సినిమా ప్రేక్షకుల్లో భారీ అంచనాలు క్రియేట్ చేసింది. పీపుల్ మీడియా ఫ్యాక్టరీ బ్యానర్‌పై ఈ సినిమా వస్తుండటంతో ఆడియెన్స్‌తో పాటు సినీ సర్కిల్స్‌లోనూ ఈ సినిమాపై మంచి హైప్ క్రియేట్ అయింది. ఆగస్టు 15న గ్రాండ్ రిలీజ్‌కి రెడీ అయిన ఈ సినిమా ప్రమోషన్స్‌లో భాగంగా నిర్మాత టి.జి.విశ్వ ప్రసాద్ మీడియాతో ముచ్చటించారు.

రవితేజతో మీరు చేస్తున్న ఈ మూడో సినిమా ‘ధమాకా’ రేంజ్‌లో సక్సెస్ సాధిస్తుందని అంటారా?

రవితేజతో ఇంకా కూడా సినిమాలు చేస్తాం. రవితేజ, హరీష్‌లది వెరీ క్రేజీ కాంబినేషన్. ఇందులో అన్ని కమర్షియల్ ఎలిమెంట్స్ ఉన్నాయి. మాస్, యాక్షన్ ఎపిసోడ్స్ పరంగా ‘మిస్టర్ బచ్చన్’ ధమాకా ప్లస్‌లా ఉంటుంది. ఇది కంప్లీట్ మాస్ ఎంటర్‌టైనర్ మూవీ.

ఆగస్టు 15నే రావాలని ఎందుకు అనుకున్నారు?

సినిమా మొదలు పెట్టినప్పుడు మే, జూన్ లోగా పూర్తి చేయాలని.. రిలీజ్ డేట్ షెడ్యూల్ ప్రకారం ప్లాన్ చేయాలని అనుకున్నాం. ఒరిజినల్‌గా ఆగస్ట్ 9న రిలీజ్ డేట్ అనుకున్నాం. కానీ సాంగ్స్ షూటింగ్ పూర్తి కాకపోవడం.. ‘పుష్ప’ స్లాట్ క్లియర్ అవ్వడంతో ఆగస్టు 15న రిలీజ్ చేయడం ది బెస్ట్ అని ఫిక్స్ అయ్యాం. ఆ రోజున రెండు పెద్ద సినిమాలు ఉన్నాయి. రెండింటికీ ఎలాంటి ప్రాబ్లం ఉండదు. లాంగ్ వీకెండ్ కలిసి వస్తుంది.

‘మిస్టర్ బచ్చన్’ను అనుకున్న బడ్జెట్‌లోనే పూర్తి చేయగలిగారా?

రవితేజ, హరీష్ శంకర్ క్రేజీ కాంబినేషన్‌లో వచ్చే సినిమా ఎంత గ్రాండ్‌గా ఉండాలో అంత గ్రాండ్‌గా తీశాం. మేము అనుకున్న బడ్జెట్టే అయ్యింది.

‘మిస్టర్ బచ్చన్’ పాటలన్నీ సూపర్ హిట్ అయ్యాయి.. మిక్కీ జే మేయర్ మ్యూజిక్ గురించి?

మిక్కీ, హరీష్‌కి ఎక్స్‌ట్రార్డినరీ సింక్ ఉంది. వాలిద్దరూ కూర్చుని సినిమాకి ఎలాంటి మ్యూజిక్ కావాలో.. అంత గ్రాండ్ అవుట్‌పుట్ తీసుకొచ్చారు. పాటలకి చాలా మంచి రెస్పాన్స్ వస్తోంది.

మిస్టర్ బచ్చన్ ప్రిమియర్స్ ఉంటాయా..?

ప్రిమియర్స్ కన్ఫర్మ్‌గా ఉంటాయి. వాటి వివరాలు త్వరలో వెల్లడిస్తాం.

మీ నెక్ట్స్ ప్రాజెక్ట్స్ గురించి..?

G2, మిరాయ్, రాజా సాబ్, సన్నీడియోల్‌తో హిందీ మూవీలు జరుగుతున్నాయి. కన్నడలో గణేష్ అనే యాక్టర్‌తో 50 కోట్ల స్పాన్ ఉన్న మూవీ చేస్తున్నాం. ఇంకో మూడు కన్నడ సినిమాలు ఉన్నాయి. తెలుగు నాలుగైదు సినిమాలు ఉన్నాయి. విశ్వక్ సేన్, అనుదీప్ మూవీ.. దీంతో పాటు ఈ ఏడాది మొదలయ్యే ఇంకా కొన్ని ప్రాజెక్ట్స్ ఉన్నాయి. ఇవి కాకుండా యూఎస్‌లో రెండు ప్రాజెక్ట్స్ చేస్తున్నాం.

రాజాసాబ్ షూటింగ్ ఎంతవరకు వచ్చింది ?

దాదాపు 50 పర్సెంట్ పైనే పూర్తయింది. ఈ ఇయర్ ఎండ్‌లోగా షూటింగ్ పూర్తయిపోతుంది.