నటుడు సిద్ధు జొన్నలగడ్డ సోదరుడు చైతు జొన్నలగడ్డ ప్రధాన పాత్రలో #MM పార్ట్-2ని పీపుల్స్ మీడియా ఫ్యాక్టరీ గతంలోనే ప్రకటించింది. విజనరీ నిర్మాత టీజీ విశ్వ ప్రసాద్ నిర్మిస్తున్న ఈ ప్రాజెక్ట్‌కు సంబంధించిన ప్రీ-లుక్ పోస్టర్ అందరినీ ఆకట్టుకుంది. అయితే, తాజాగా ఈ చిత్రానికి సంబంధించిన టైటిల్ మరియు ఫస్ట్ లుక్‌ను లాంచ్ చేశారు.
ఈ చిత్రానికి చైతు ప్రధాన పాత్ర పోషించడమే కాకుండా కథ, స్క్రీన్ ప్లే, డైలాగ్స్‌ను కూడా అందిస్తున్నాడు. ఇక ఈ చిత్రాన్ని ‘బొమ్మ బ్లాక్‌బస్టర్’ ఫేమ్ రాజ్ విరాట్ డైరెక్ట్ చేస్తున్నాడు. కాగా, నేడు(నవంబర్ 14) నేచురల్ స్టార్ నాని సినిమా టైటిల్, ఫస్ట్ లుక్ పోస్టర్‌ను లాంచ్ చేసి టీమ్‌కి శుభాకాంక్షలు తెలిపారు. ‘మోసెస్ మాణిక్చంద్ పార్ట్-2’ అనే టైటిల్‌తో రాబోతోన్న ఈ చిత్రం డిఫరెంట్‌గా ఉండబోతోందని పోస్టర్‌ను చూస్తేనే తెలుస్తోంది. ఈ చిత్ర పోస్టర్‌ను చిల్డ్రన్స్ డే సందర్భంగా రిలీజ్ చేస్తూ.. హ్యాపీ ‘నో చిల్డ్రెన్స్’ డే అని పెట్టారు. దీంతో మరింత ఆసక్తికరంగా మారింది.
చైతు జొన్నలగడ్డ ఈ ఫస్ట్ లుక్ పోస్టర్‌లో రాజకుర్చీపై రాజసం ఉట్టి పడేలా కూర్చుండగా.. భారీ ఆభరణాలు, స్టైలిష్ హెయిర్, లేత గడ్డం, సన్ గ్లాసెస్‌తో డిఫరెంట్ లుక్‌లో కనిపిస్తున్నాడు. ఒంటిపై ఆ టాటూలు పాత్ర తీరు, స్వభావాన్ని సూచించేలా ఉన్నాయి. ఈ మూవీకి పెట్టిన ట్యాగ్‌లైన్ ‘ఎ రియల్ విలన్ ఈజ్ ఆల్వేస్ బెటర్ దేన్ ఎ ఫేక్ హీరో’ కూడా ఇంట్రెస్ట్ క్రియేట్ చేసేలా ఉంది. ఈ చిత్రానికి సంబంధించిన ఇతర నటీనటులు, సాంకేతిక నిపుణుల వివరాలను త్వరలో వెల్లడించనున్నారు.