ప్రముఖ నిర్మాణ సంస్థ GA2 పిక్చ‌ర్స్ బ్యాన‌ర్ నుంచి రాబోతున్న లేటెస్ట్ మూవీ ‘ఆయ్’ ఇప్పటికే ఆడియెన్స్‌లో మంచి బజ్‌ను క్రియేట్ చేసింది. ఈ సినిమాలో యంగ్ హీరో నార్నే నితిన్, నయన్ సారిక జంటగా నటించారు. అంజి కె.మణిపుత్ర ఈ చిత్రంతో డైరెక్టర్‌గా ప‌రిచ‌యం అవుతున్నారు. బ‌న్నీ వాస్‌, విద్యా కొప్పినీడి ఈ చిత్రాన్ని నిర్మిస్తున్నారు. ఆగస్ట్ 15న ఈ మూవీ రిలీజ్ అవుతున్న నేపథ్యంలో హీరో నార్నే నితిన్ మీడియాతో ‘ఆయ్’ సినిమా విశేషాల‌ను పంచుకున్నారు.
* ఈ సినిమాకు ముందుగా ‘ఆయ్’ అనే టైటిల్‌ను అనుకోలేదు. గోదావ‌రి స్లాంగ్‌లో ఆయ్ అనే ప‌దాన్ని కామ‌న్‌గా వాడుతుంటాం. అలాగే సినిమాలోని ప‌లు సంద‌ర్భాల్లో ఈ ప‌దాన్ని వాడ‌టాన్ని చూడొచ్చు. కాబ‌ట్టే టైటిల్‌ను ‘ఆయ్’ అని ఫిక్స్ చేశాం.
* ఆగస్ట్ 15న చాలా సినిమాలు రిలీజ్ అవుతున్నాయి. అయితే మాకుండాల్సిన ఆడియెన్స్ మాకున్నార‌ని అనుకుంటున్నాం. మంచి ఫన్ ఉన్న గోదావ‌రి బ్యాక్‌డ్రాప్ మూవీ వ‌చ్చి చాలా కాల‌మైంది. క‌చ్చితంగా ఆడియెన్స్ ఎంజాయ్ చేస్తార‌ని న‌మ్ముతున్నాం.
* దర్శకుడు అంజి కె మణిపుత్ర అమలాపురం కుర్రాడు. ఆయ‌నకున్న ఫ్ర‌స్టేష‌న్స్‌, లైఫ్‌లో ఆయ‌న చూసినవ‌న్నీ క‌లిపి చేసిన సినిమానే ‘ఆయ్’. డైరెక్ట‌ర్ ఎవ‌రితోనైనా ఇట్టే క‌లిసి పోయే వ్య‌క్తి. సెట్స్‌లో అంద‌రితో ఫ్రెండ్లీగా ఉంటారు.
* ఎన్టీఆర్ గారు ట్రైల‌ర్ చూశారు. ఆయ‌న‌కు కామెడీ బాగా న‌చ్చింది. ఎంజాయ్ చేశారు. సినిమా చూసిన త‌ర్వాత కూడా ఆయ‌న ద‌గ్గ‌ర నుంచి అలాంటి రెస్పాన్స్ వ‌స్తే బావుంటుంద‌ని అనిపిస్తుంది.
* అంకిత్ కొయ్య, క‌సిరెడ్డిగారితో ‘ఆయ్’ సినిమాకు సంబంధించిన జ‌ర్నీ చాలా బావుంది. బాగా డిస్క‌ష‌న్ చేసుకుని ఎలా చేస్తే బావుంటుంద‌నే స‌ల‌హాల‌ను తీసుకుని న‌టించాం.
* రామ్ మిర్యాల గారు మూడు పాటలకు సంగీతాన్నిస్తే.. అజ‌య్ అర‌సాడ గారు రెండు పాటలకు మ్యూజిక్ ఇస్తూ బ్యాగ్రౌండ్ స్కోర్ అందించారు. మ్యూజిక్ సినిమా స‌క్సెస్‌లో చాలా కీల‌క పాత్ర పోషిస్తుంది.
* హీరోయిన్ నయన్ సారిక మ‌రాఠీ అమ్మాయి. కానీ తెలుగు అమ్మాయిలా ఉంటుంది. త‌న పాత్ర అంద‌రికీ బాగా క‌నెక్ట్ అవుతుంది.
* కులం, మ‌తం కంటే స్నేహం చాలా గొప్ప‌ది. అంత కంటే గొప్ప విష‌య‌మేదీ ఉండ‌ద‌నే మెసేజ్‌ను ‘ఆయ్’ సినిమాలో ఇస్తున్నాం.