రెండు తెలుగు రాష్ట్రాలను ఇటీవల ముంచుకొచ్చిన వరదలు అతలాకుతలం చేశాయి. ఈ వరదల కారణంగా ప్రజలు తీవ్రంగా ఇబ్బందులు పడుతున్నారు . ఈ నేపథ్యంలో బాధితుల సహాయార్థం ఎన్టీఆర్, ప్రభాస్, చిరంజీవి వంటి స్టార్ హీరోలతో పాటు పలువురు యంగ్ హీరోలు కూడా విరాళాలు ఇచ్చారు. ఈ క్రమంలోనే నిహారిక కూడా తనవంతు సాయం చేస్తూ.. బుడమేరు ముంపునకు గురైన పది గ్రామాలకు ఒక్కో దానికి రూ.50వేల చొప్పున రూ.5 లక్షల విరాళాన్ని పవన్ కల్యాణ్‌ స్ఫూర్తితో ప్రకటించింది.
ఐతే, తాజాగా నిహారికను అభినందిస్తూ పవన్ కళ్యాణ్ ఓ పోస్ట్‌ పెట్టారు. ‘ఆంధ్రప్రదేశ్‌లో వరద బాధితులను ఆదుకునేందుకు ముందుకువచ్చి ఒక్కో గ్రామానికి రూ.50వేలు చొప్పున రూ.5 లక్షల విరాళమిచ్చిన నిహారికకు అభినందనలు తెలుపుతున్నా. కష్టకాలంలో ప్రజలకు అండగా ఉండాలనే మంచి సంకల్పంతో సాయం చేసేందుకు ముందుకు రావడం సంతోషాన్నిచ్చింది. ఇటీవలే పల్లెటూరి వాతావరణాన్ని ప్రతిబింబించేలా ‘కమిటీ కుర్రోళ్లు’తో నిర్మాతగా విజయం సాధించిన నిహారిక భవిష్యత్తులో మరిన్ని విజయాలు అందుకోవాలని ఆకాంక్షిస్తున్నాను’ అని పవన్ తన పోస్ట్‌లో రాసుకొచ్చారు.