ఐకాన్ స్టార్ అల్లు అర్జున్ నటిస్తున్న ప్రెస్టీజియస్ సీక్వెల్ మూవీ ‘పుష్ప-2’ కోసం ప్రేక్షకులు ఎంత ఆసక్తిగా ఎదురుచూస్తున్నారో అందరికీ తెలిసిందే. క్రియేటివి జీనియస్ సుకుమార్ ఈ చిత్రాన్ని తెరకెక్కిస్తుండగా, పూర్తి యాక్షన్ రివెంజ్ డ్రామాగా ఈ సినిమా రానుంది. ఇక ఈ సినిమా నుంచి ఇప్పటికే రిలీజ్ అయిన పోస్టర్స్, సాంగ్స్, వీడియో గ్లింప్స్ ఈ చిత్రంపై హైప్‌ను అమాంతం పెంచేశాయి.
కాగా, ఈ సినిమా రిలీజ్‌కి ముందే పలు కొత్త రికార్డులను క్రియేట్ చేస్తోంది. తాజాగా ప్రముఖ టికెట్ బుకింగ్ ప్లాట్‌ఫామ్ బుక్ మై షోలో ఈ సినిమాకు ఏకంగా 319K ఇంట్రెస్ట్స్ లభించాయి. 2024లోనే ఏ సినిమాకైనా ఇది అత్యధికం అని మేకర్స్ తెలిపారు. దీంతో ఈ సినిమా కోసం ప్రేక్షకులు ఎంత ఆసక్తిగా వెయిట్ చేస్తున్నారో అర్థమవుతోంది.
ఇక ఈ సినిమాలో నేషనల్ క్రష్ రష్మిక మందన్న హీరోయిన్‌గా నటిస్తోంది. ఈ సినిమాకు రాక్‌స్టార్ దేవిశ్రీ ప్రసాద్ సంగీతం అందిస్తుండగా, మైత్రీ మూవీ మేకర్స్ ఈ చిత్రాన్ని భారీ బడ్జెట్‌తో ప్రొడ్యూస్ చేస్తున్నారు. ఈ సినిమాను డిసెంబర్ 6న రిలీజ్ చేసేందుకు మేకర్స్ రెడీ అవుతున్నారు.