మ్యాన్ ఆఫ్ మాసెస్ జూ.ఎన్టీఆర్ నటిస్తున్న తాజా చిత్రం ‘దేవర’ కోసం ప్రేక్షకులు ఎంత ఆసక్తిగా ఎదురుచూస్తున్నారో అందరికీ తెలిసిందే. ఈ సినిమాను స్టార్ డైరెక్టర్ కొరటాల శివ తెరకెక్కిస్తుండగా, బాలీవుడ్ బ్యూటీ జాన్వీ కపూర్ ఈ సినిమాలో హీరోయిన్‌గా నటిస్తోంది. ఇప్పటికే ఈ సినిమా నుంచి రిలీజ్ అయిన టీజర్, సాంగ్స్‌కి మాసివ్ రెస్పాన్స్ లభించింది.
ఇక ఈ సినిమాతో జాన్వీ కపూర్ టాలీవుడ్‌లో మోస్ట్ వాంటెడ్ హీరోయిన్‌గా మారిపోయింది. ఇప్పటికే ఆమె తన నెక్ట్స్ ప్రాజెక్ట్‌ని గ్లోబల్ స్టార్ రామ్ చరణ్‌తో కలిసి చేయబోతుంది. ఈ సినిమాను ఇటీవల అధికారికంగా ప్రారంభించారు. కాగా, జాన్వీ కపూర్ కోసం ఐకాన్ స్టార్ అల్లు అర్జున్ కూడా ఎదురుచూస్తున్నాడు. ఆయన నటిస్తున్న ‘పుష్ప-2’ సినిమాలో ఓ స్పెషల్ సాంగ్‌లో జాన్వీ కనిపించనుందని తెలుస్తోంది.
అయితే, గతంలోనే ఆమె ఈ సినిమా షూటింగ్‌లో జాయిన్ కావాల్సి ఉన్నా, ‘దేవర’ నిర్మాతలతో చేసుకున్న ఒప్పందం ప్రకారం సినిమా రిలీజ్ అయ్యాకే ఆమె వేరొక సినిమాను ప్రారంభించాలి. అటు ‘పుష్ప-2’ ఆగస్టు 15న రావాల్సి ఉండగా, అది డిసెంబర్ 6కి వాయిదా పడింది. దీంతో ఎప్పుడెప్పుడు జాన్వీ కపూర్ ‘దేవర’ నుంచి ఫ్రీ అవుతుందా అని పుష్పరాజ్ ఎదురుచూస్తున్నాడు. మరి నిజంగానే ‘పుష్ప-2’లో ఈ బ్యూటీ చిందులు వేయనుందా.. అనేది వేచి చూడాలి.