మాస్ రాజా రవితేజ నటించిన లేటెస్ట్ మూవీ ‘మిస్టర్ బచ్చన్’ నేడు వరల్డ్‌వైడ్‌గా రిలీజ్ కావడంతో అభిమానులతో థియేటర్ల వద్ద పండుగ వాతావరణం కనిపిస్తోంది. దర్శకుడు హరీష్ శంకర్ తెరకెక్కించిన ఈ మాస్ యాక్షన్ ఎంటర్‌టైనర్‌ను చూసేందుకు ప్రేక్షకులు ఆసక్తిని చూపుతున్నారు. ఇక ఈ సినిమాకు సంబంధించి ఎలాంటి వార్త వచ్చినా అభిమానులు ఫాలో అవుతున్నారు.
అయితే, ఈ సినిమాలో రవితేజ ఓ లెజెండరీ యాక్టర్‌ను అభిమానులకు గుర్తుచేశాడు. టాలీవుడ్ దివంగత లెజెండరీ నటుడు అక్కినేని నాగేశ్వర్ రావుని రవితేజ ఇమిటేట్ చేయడం అభిమానులను సర్‌ప్రైజ్ చేసింది. ఓ సీన్‌లో సీనియర్ నటి అన్నపూర్ణ రవితేజను డ్యాన్స్ చేయమని కోరితే.. అక్కినేని క్లాసికల్ సాంగ్స్‌లో ఆయనను ఇమిటేట్ చేస్తూ రవితేజ డ్యాన్స్ చేశాడు. దీంతో థియేటర్లలో అభిమానులు విజిల్స్ వేస్తూ రచ్చ చేశారు.
ఈ సీన్ చూసిన అక్కినేని అభిమానులు కూడా థ్రిల్ అవుతున్నారు. ఇక ఈ సినిమాలో అందాల భామ భాగ్యశ్రీ బొర్సె హీరోయిన్‌గా నటించగా, జగపతి బాబు విలన్ పాత్రలో నటించాడు. మిక్కీ జే మేయర్ సంగీతం అందించిన ఈ సినిమాను పీపుల్ మీడియా ఫ్యాక్టరీ బ్యానర్ పై టి.జి.విశ్వప్రసాద్ ప్రొడ్యూస్ చేశారు.
