టాలీవుడ్‌లో తెరకెక్కుతున్న సంక్రాంతి చిత్రాల్లో ‘సంక్రాంతికి వస్తున్నాం’ ఇప్పటికే ఫ్యామిలీ ఆడియెన్స్‌కు దగ్గరయ్యింది. ఈ సినిమాతో విక్టరీ వెంకటేష్, అనిల్ రావిపూడి కాంబినేషన్ మరోసారి బాక్సాఫీస్ దగ్గర బ్లాక్‌బస్టర్ హిట్ అందుకోవడం ఖాయమని అభిమానులు ధీమా వ్యక్తం చేస్తున్నారు. ఇక వారి అంచనాలను అందుకునే విధంగా ఈ మూవీ నుంచి రిలీజ్ అయిన ప్రమోషనల్ కంటెంట్ కూడా అందరినీ ఆకట్టుకుంది.
ఇక తాజాగా ఈ సినిమా నుంచి ట్రైలర్‌ను రిలీజ్ చేసేందుకు మేకర్స్ రెడీ అవుతున్నారు. ‘సంక్రాంతికి వస్తున్నాం’ చిత్ర ట్రైలర్ లాంచ్ ఈవెంట్ సోమవారం రోజున నిజామాబాద్‌లో సాయంత్రం 5 గంటలకు ప్రారంభం కానుంది. ఈ ఈవెంట్‌కు చిత్ర యూనిట్ హాజరుకానుంది. అయితే, ఈ ట్రైలర్‌ను డిజిటల్ మాధ్యమంలో రాత్రి 8.01 గంటలకు రిలీజ్ చేయబోతున్నట్లు చిత్ర యూనిట్ పేర్కొంది.
ఐశ్వర్య రాజేష్, మీనాక్షి చౌదరి హీరోయిన్లుగా నటిస్తున్న ఈ సినిమాకు భీమ్స్ సిసిరోలియో సంగీతం అందిస్తున్నాడు. ఈ సినిమాను దిల్ రాజు సమర్పణలో శిరీష్ ప్రొడ్యూస్ చేస్తున్నారు. మరి ఈ చిత్ర ట్రైలర్ ఎలా ఉండబోతుందో తెలియాలంటే మరికొద్ది గంటలు వెయిట్ చేయాల్సిందే.