తెలుగు రాష్ట్రాలను వరదలు ముంచెత్తుతున్నాయి. ఏపీతో పాటు తెలంగాణలోనూ ఈ వరద ప్రభావంతో చాలా మంది ప్రజలు తీవ్రంగా నష్టపోయారు. పలువురు ప్రాణాలు కూడా కోల్పోయారు. అయితే, వరద బాధితుల సహాయార్థం పలువురు ప్రముఖులు ముందుకు వచ్చి తమవంతు ఆర్థిక సాయం అందిస్తున్నారు.
తెలుగు సినీ పరిశ్రమ నుంచి కూడా పెద్ద సంఖ్యలో స్టార్స్ తమవంతు ఆర్థిక సాయం ప్రకటిస్తున్నారు. ఇప్పటికే జూ.ఎన్టీఆర్, విశ్వక్ సేన్, సి.అశ్వనీదత్ వంటి వారు వరద బాధితులకు ఆర్థికసాయం అందిస్తున్నట్లు ప్రకటించారు. ఇక తాజాగా స్టార్ బాయ్ సిద్ధు జొన్నలగడ్డ కూడా తనవంతు బాధ్యతగా వరద బాధితులకు ఆర్థిక సాయాన్ని ప్రకటించాడు. ఏపీ వరద బాధితులకు రూ.15 లక్షలు, తెలంగాణ వరద బాధితులకు రూ.15 లక్షల చొప్పున ఆయా రాష్ట్రాల ప్రభుత్వానికి ఈ విరాళాన్ని అందజేయనున్నాడు.
ఇలాంటి విపత్కర పరిస్థితుల్లో ప్రజలకు అండగా ఉండాలని ఆయనతో పాటు పలువురు స్టార్స్ పిలుపునిస్తున్నారు. ఇలా సినీ పరిశ్రమ నుంచి పలువురు స్టార్స్ ముందుకు రావడంపై అభిమానులు ప్రశంసలు కురిపిస్తున్నారు.
