కొన్నేళ్ల క్రితం శేఖర్ కమ్ముల తెరకెక్కించినా లైఫ్ ఈజ్ బ్యూటిఫుల్ మూవీ ద్వారా పరిచయం అయిన యువ నటుల్లో సుధాకర్ కొమాకుల కూడా ఒకరు. ఆ మూవీ అనంతరం అక్కడక్కడా పలు సినిమాల్లో నటించి తన నటనతో ఆడియన్స్ ని ఆకట్టుకున్నారు సుధాకర్. ఇటీవల నారాయణ అండ్ కో చిత్రం ద్వారా ఆయన ఆడియన్స్ ముందుకి వచ్చారు. ఇక తాజాగా మెమొరీస్ అనే బహుభాషా మ్యూజిక్ వీడియోతో ప్రేక్షకుల ముందుకు రానున్నారు. ఈ సాంగ్ ని సుధాకర్ తన సొంత బ్యానర్ సుఖ మీడియాలో నిర్మించారు. యుఎస్ఏ లోని శాన్ ఫ్యాన్సిస్కో నగరంలో ఈ పాటని రియల్ వరల్డ్ ఫుటేజ్, 2డి యానిమేషన్ తో కలిపి చిత్రీకరించారు. మెమొరీస్ వీడియో సాంగ్ ని తెలుగు, తమిళం, మలయాళం, కన్నడ, హిందీ భాషల్లో నివ్రితి వైబ్స్ యూట్యూబ్ వేదికపై రిలీజ్ అయింది. అందులో భాగంగా సాంగ్ టీజర్ ను నేడు విడుదల చేశారు.
ప్రముఖ యూట్యూబ్ ఛానల్ నివ్రితి వైబ్స్ వారు ఫ్యాన్సీ రేటుకు ఈ సాంగ్ రైట్స్ ను సొంతం చేసుకోవడం విశేషం. వర్ధమాన ఫిలిం మేకర్ అన్వేష్ భాష్యం దర్శకత్వంలో ఈ సాంగ్ తెరకెక్కింది. గతంలో అన్వేష్ సైమా అవార్డ్స్ లో నామినేట్ అయిన చోటు అనే షార్ట్ ఫిలింకి కాన్సెప్ట్ రైటర్ గా, సోని మ్యూజిక్ లో విడుదలైన మరో షార్ట్ ఫిలిం మనోహరం కి కూడా రైటర్ గా, ఎగ్జిక్యూటివ్ ప్రొడ్యూసర్ గా పనిచేశారు. ఇప్పుడు మెమొరీస్ సాంగ్ వరుణ్ అనే యువకుడి కథని తెలియజేసే విధంగా ఉంటుంది. మెమొరీస్ సాంగ్ కాన్సెప్ట్ విషయానికి వస్తే వరుణ్ అనే యువకుడు తన జర్నీలో ఫీలింగ్స్ కోల్పోయే స్థితి నుంచి తన గమ్యం ఏంటి అని తెలుసుకునే వాడిగా ఎలా మారాడు అనేది ఉంటుంది. ఈ పాటని అరుణ్ చంద్రశేఖరన్ కంపోజ్ చేశారు.
తెలుగులో ఈ పాటకి రాహుల్ సిప్లిగంజ్ గాత్రం అందించగా.. కన్నడలో వాసుకి వైభవ్ పాడారు. ఈ వీడియో సాంగ్ విజువల్స్ పరంగా ఆకట్టుకుంటూ సింపుల్ హుక్ స్టెప్ కూడా కలిగి ఉంటుంది. ప్రతి ఒక్కరూ డ్యాన్స్ చేయాలనిపించే విధంగా ఆ స్టెప్ ఉంటుంది. సుధాకర్ కోమాకుల నేతృత్వంలో నిర్మించబడిన ఈ సాంగ్ అన్ని వర్గాల ప్రేక్షకులని ఎంటర్టైన్ చేసే విధంగా ఉందని చెప్పాలి. ఈ సాంగ్ లోని మెలోడీ, వీడియో ఆకట్టుకుంటూ జీవితంలో చోటు చేసుకునే మార్పులని హైలైట్ చేసే విధంగా ఉంది. మెమోరీస్ సాంగ్ మ్యూజిక్ వీడియో ను టాలెంటెడ్ నటుడు అడివి శేష్ విడుదల చేశారు. సాంగ్ టీజర్ కు మంచి స్పందన లభించింది. అలాగే ఫుల్ సాంగ్ కూడా చక్కటి ఆదరణ పొందుతోంది. ఇక రాబోయే రోజుల్లో మంచి కథలు దొరికితే సినిమాలు చేయాలనేది తన ఆలోచన అంటున్నారు సుధాకర్.
