తమిళ హీరో సూర్య హీరోగా రాబోతున్న చిత్రం ‘కంగువా’. శివ దర్శకత్వంలో రూపొందుతున్న ఈ సినిమా పై భారీ అంచనాలు ఉన్నాయి. ప్రపంచ వ్యాప్తంగా భారీ స్థాయిలో విడుదల కానున్న ఈ ఎపిక్ యాక్షన్ డ్రామా కోసం ఫ్యాన్స్ ఎంతో ఆసక్తిగా ఎదురుచూస్తున్నారు. అందుకు తగ్గట్టుగానే మేకర్స్ తమ ప్రచారాన్ని ముమ్మరం చేశారు. అందులో భాగంగా ముంబయి వెళ్లిన సూర్య ఇచ్చిన ఓ ఇంటర్వ్యూలో బాలీవుడ్ లో తాను చేయబోయే సినిమా పై ఇంట్రెస్టింగ్ కామెంట్స్ చేశారు.

సూర్య మాట్లాడుతూ.. ‘నేను చేసే ఓ సినిమా సెట్స్‌ పైకి వెళ్లాలంటే చాలా ప్రాసెస్‌ ఉంటుంది. ఏడాది క్రితమే దానిపై చర్చలు జరిగాయి. కాకపోతే ఆ సినిమాని నిర్మాతలు ప్రకటిస్తేనే బాగుంటుంది. అందుకే, నేను ఇప్పుడు ఏం చెప్పలేకపోతున్నాను. కానీ బాలీవుడ్ లో కచ్చితంగా డైరెక్ట్ స్ట్రేట్ సినిమా చేస్తాను’ అని అన్నారు. దర్శకుడు రాకేశ్‌ ఓంప్రకాశ్‌ దర్శకత్వంలో ఈ సినిమా రానుంది.

ఈ చిత్రంలో దిశా పటాని కథానాయికగా నటిస్తుండగా, బాబీ డియోల్ విలన్‌గా నటించారు. స్టూడియో గ్రీన్ మరియు యువి క్రియేషన్స్ నిర్మించిన కంగువా చిత్రానికి దేవి శ్రీ ప్రసాద్ సంగీతాన్ని అందించారు. ఇప్పటికే, పార్ట్ 2, పార్ట్‌ 3 కథలు సిద్ధంగా ఉన్నాయని, కంగువా పార్ట్‌ 1 విజయం ఆధారంగా వాటిని తెరకెక్కించేలా ప్లాన్ చేస్తున్నామని నిర్మాత కేఈ జ్ఞానవేల్‌ చెప్పుకొచ్చారు.