తెలంగాణ ముఖ్యమంత్రి రేవంత్ రెడ్డిని ఆయన నివాసంలో ఈరోజు తెలుగు సినీ పరిశ్రమకు చెందిన ప్రజా ప్రతినిధులు, పలువురు ప్రముఖులు కలిశారు. అసెంబ్లీ ఎన్నికల్లో విజయం సాధించిన సీఎంను అభినందించారు. ఈ సమావేశంలో పరిశ్రమకు సంబంధించిన పలు కీలక అంశాలపై చర్చించారు. తెలుగు చలనచిత్ర వాణిజ్య మండలి అధ్యక్షుడు దిల్ రాజు, తెలుగు చలనచిత్ర నిర్మాతల మండలి అధ్యక్షుడు కె.ఎల్. దామోదర ప్రసాద్, మండలి కార్యదర్శి వీవైఎస్ చౌదరి, తెలంగాణ రాష్ట్ర చలనచిత్ర వాణిజ్య మండలి అధ్యక్షుడు సునీల్ నారాయణ, కార్యదర్శి కె. అనుపమారెడ్డి, ఎంప్లాయీస్ ఫెడరేషన్ అధ్యక్షుడు అనిల్ కుమార్, కార్యదర్శి టీఎస్ఎన్ దొర, ప్రొడ్యూసర్స్ గిల్డ్ అధ్యక్షుడు పీవీ రవికిషోర్, కోశాధికారి బాపినీడు, సుప్రియ తదితరులు సీఎంను కలిశారు.
పరిశ్రమకు సంక్షేమ చర్యలపై ముఖ్యమంత్రి టిఎఫ్‌ఐ ప్రతినిధులకు హామీ ఇచ్చినట్లు సమాచారం. ఈ భేటీకి సంబంధించిన ఫోటో ఇప్పుడు సోషల్ మీడియాలో వైరల్ అవుతోంది. టీఎస్‌ ప్రభుత్వానికి నిరంతర సహకారం అందించినందుకు టీఎఫ్‌ఐ ప్రతినిధులు కృతజ్ఞతలు తెలిపారు.
