కోలీవుడ్ స్టార్ యాక్టర్ చియాన్ విక్రమ్ ప్రధాన పాత్రలో నటించిన తంగలాన్ చిత్రం ఆగస్టు 15 వ తేదీన వరల్డ్ వైడ్ గా థియేటర్లలో రిలీజ్ కి రెడీ అయిపోయింది. ఈ పీరియాడిక్ మూవీకి పా. రంజిత్ దర్శకత్వం వహించారు. కోలార్ గోల్డ్ ఫీల్డ్స్ నేపథ్యంలో కొన్ని నిజ జీవిత సంఘటనల ఆధారంగా తెరకెక్కిన ఈ చిత్రంలో మాళవిక మోహనన్, పార్వతి తిరువోతు, పశుపతి తదితరులు కీలక పాత్రల్లో కనిపించనున్నారు.
ఇప్పటికే ఈ చిత్రం నుండి రిలీజైన ప్రచార చిత్రాలు సినిమా పై మంచి హైప్ ను క్రియేట్ చేశాయి. మేకర్స్ పలు కీలక ప్రాంతాలను సందర్శిస్తూ, సినిమాను ప్రమోట్ చేస్తున్నారు. ఒక కార్యక్రమంలో విక్రమ్‌ని తంగలాన్‌కి సీక్వెల్ చేస్తారా అని అడిగారు. దానికి విక్రమ్ బదులిస్తూ, ప్రీక్వెల్ లేదా సీక్వెల్ చేయడానికి స్కోప్ ఉంది. తర్వాతి భాగాన్ని తప్పకుండా చేస్తాం. చాలా కథాంశాలు దానితో ముడిపడి ఉన్నందున నాలుగు భాగాలు కూడా తీయవచ్చు. నేను జోక్ చేయడం లేదు. రాబోయే చిత్రాలకు కథలు భిన్నంగా ఉంటాయి. ఇతర భాగాలకు కథానాయకుడి లుక్ మరియు దుస్తులు భిన్నంగా ఉంటాయి అని అన్నారు. నీలం ప్రొడక్షన్స్, స్టూడియో గ్రీన్, జియో స్టూడియోస్ సంయుక్తంగా నిర్మిస్తున్న ఈ చిత్రానికి జీవి ప్రకాష్ కుమార్ సంగీతం అందించారు.