విడుదల తేదీ : సెప్టెంబర్ 07, 2018
123తెలుగు.కామ్ రేటింగ్ : 2.75/5
నటీనటులు : సునీల్, అల్లరి నరేష్, పూర్ణ , చిత్రశుక్ల, జయ ప్రకాష్ రెడ్డి, పోసాని, బ్రహ్మానందం తదితరులు.
దర్శకత్వం : భీమనేని శ్రీనివాసరావు
నిర్మాతలు : కిరణ్ రెడ్డి, భరత్ చౌదరి
సంగీతం : శ్రీ వసంత్
సినిమాటోగ్రఫర్ : అనీష్ తరుణ్ కుమార్
స్క్రీన్ ప్లే : భీమనేని శ్రీనివాసరావు
ఎడిటర్ : గౌతమ్ రాజు
బీమనేని శ్రీనివాసరావు దర్శకత్వంలో అల్లరి నరేష్ మరియు సునీల్ కలిసి ప్రధాన పాత్రల్లో నటించిన చిత్రం ‘సిల్లీ ఫెలోస్’. కామెడీ ఎంటర్ టైనర్ గా రూపొందిన ఈ చిత్రంలో పూర్ణ, చిత్ర శుక్ల హీరోయిన్లుగా నటించారు. కాగా కిరణ్ రెడ్డి, భరత్ చౌదరి నిర్మాణంలో తెరకెక్కిన ఈ చిత్రం ఈ రోజు సెప్టెంబర్ 7న విడుదల అయింది. మరి ప్రేక్షకులును ఏ మేరకు మెప్పించిందో సమీక్షలోకి వెళ్లి తెలుసుకుందాం!
కథ :
నరేష్ (వీర బాబు) ఓ ట్రైలర్ గా వర్క్ చేస్తూనే.. ఆ ఊరి ఎమ్మెల్యే (జయ ప్రకాష్ రెడ్డి)కి రైట్ హ్యాండ్ లా ఉంటాడు. కాగా ఎమ్మెల్యేకి చెడ్డపేరు తెచ్చి, అతనికి రాబోయే మంత్రి పదవిని తాను దక్కించుకోవాలని చూస్తుంటాడు మరో ఎమ్మెల్యే (రాజా రవింద్ర). ఆ ప్రయత్నంలో భాగంగా ఎమ్మెల్యే జరిపించే వివాహాలను చెడగొట్టడానికి పెళ్లి చేసుకుబోయే జంటలను తప్పిస్తాడు. ఆ విషయం తెలుసుకున్న వీరబాబు అప్పటికప్పుడు దొరికిన వాడ్ని తీసుకొచ్చి పెళ్ళికొడుకుని చేస్తాడు. ఆ క్రమంలో ఓ జంట మిస్ అవ్వగా.. తన ఫ్రెండ్ సూరిబాబు (సునీల్)కి మాయ మాటలు చెప్పి క్లబ్ డాన్సర్ పుష్ప (నందిని రాయ్)తో సూరిబాబు పెళ్లి జరిపించేస్తాడు. దాంతో సూరిబాబు ప్రేమించి పెళ్లిచేసుకోబోయే అమ్మాయి (పూర్ణ) అతన్ని ఛీ కొడుతుంది. పుష్పతో ఎటువంటి సంబంధం లేదని ప్రూవ్ చేస్తేనే మనం ఒకటవుతాం అని కండీషన్ పెడుతుంది.
పుష్పతో తనకు ఎలాంటి సంబంధం లేదని నిరూపించడానికి సూరిబాబు ఏం ప్లాన్స్ వేశాడు ? ఆ ప్లాన్స్ ని కూడా వీరబాబు తన లవ్ కి అనుగుణంగా ఎలా వాడుకున్నాడు ? ఆ క్రమంలో వీరబాబు తన లవ్ లో ఎదురుకున్న సమస్యలు ఏమిటి ? తనూ ప్రేమించిన వాసంతిని చివరకి దక్కించుకున్నాడా ? లేదా ? మరి సూరిబాబు పుష్పని ఎలా వదిలించుకున్నాడు ? తన ప్రేమించిన పూర్ణని పెళ్లి చేసుకుంటాడా ? లేదా ? లాంటి విషయాలు తెలియాలంటే ఈ చిత్రం చూడా ల్సిందే.
ప్లస్ పాయింట్స్ :
అల్లరి నరేష్ గత తన సినిమాల్లో కంటే ఈ సినిమాలో ఫ్రెష్ గా కనిపించాడు. గత తన హిట్ సినిమాల్లోని కామెడీ టైమింగ్ ని గుర్తుకు తెస్తూ.. వీరబాబు క్యారెక్టర్ తో మంచి కామెడీని పండించాడు. మెయిన్ గా తన అవసరాలకు సునీల్ ని వాడుకున్న విధానం, హీరోయిన్ తో సాగే సన్నివేశాల్లో పాత నరేష్ ని గుర్తుకు తెస్తాడు.
చాలా సంవత్సరాల తర్వాత మళ్లీ కమెడియన్ గా ఎంట్రీ ఇచ్చిన సునీల్ సూరిబాబు పాత్రలో ఒదిగిపోయాడు. ఆ పాత్ర తాలూకు ఎక్స్ ప్రెషన్స్ దగ్గర నుంచి మాడ్యులేషన్ వరకు చాలా చక్కగా పలికించాడు. తన పాత్రకి ఎదురయ్యే ఇబ్బందికర సంఘటనల ద్వారానే నవ్విస్తూ.. సునీల్ తన పాత్రకి పూర్తి న్యాయం చేశాడు.
ఇక కథానాయకిగా నటించిన చిత్ర శుక్ల తన గ్లామర్ తోనే కాకుండా తన నటనతో కూడా ఆకట్టుకున్నే ప్రయత్నం చేసింది. పోలీస్ ఆఫీసర్ గా కూడా ఆమె చాలా కాన్ఫిడెంట్ గా నటించి మెప్పించింది. అలాగే గెస్ట్ రోల్ లో కనిపించిన పూర్ణ కూడా ఉన్నంతలో తన మార్క్ నటన కనబరిచింది. సినిమాలో కీలక పాత్ర అయిన పుష్పగా నటించిన నందిని రాయ్ ట్రాక్ కూడా పర్వాలేదనిపిస్తోంది.
ఎమ్మెల్యే పాత్రలో నటించిన జేపీ తన కామెడీ టైమింగ్ తో అక్కడక్కడా బాగా నవ్విస్తాడు. పోసాని కూడా తనకు మాత్రమే సాధ్యమయ్యే బాడీ లాంగ్వేజ్ తో ప్రీ క్లైమాక్స్ లో కాసేపు నవ్విస్తాడు. ఇక మిగిలిన నటీనటులు కూడా తమ పాత్ర పరిధి మేరకు బాగానే చేసారు.
మైనస్ పాయింట్స్ :
దర్శకుడు భీమనేని శ్రీనివాసరావు మంచి కామెడీ ఎంటర్ టైనర్ ను తెరకెక్కించే ప్రయత్నం చేసినప్పటికీ, అది అంతగా పండలేదు. కొన్ని చోట్ల బాగానే నవ్వించినా మెయిన్ ప్లాట్ లోనే లాజిక్స్ మిస్ అవ్వడం, కొన్ని సన్నివేశాల్లో నాటకీయత మరీ ఎక్కువ అవ్వడంతో సినిమా ఫలితం దెబ్బతింది.
దీనికి తోడు పేపర్ మీద రాసుకున్న కామెడీని, స్క్రీన్ మీద సరిగ్గా ఎగ్జిక్యూట్ చేయలేకపోయారు. ఆయన రెండువ భాగం పై ఇంకొన్ని జాగ్రత్తలు తీసుకోని ఉండి ఉంటే బాగుండేది. రెండువ భాగంలో అక్కడక్కడ కామెడీ సన్నివేశాలు బాగున్నప్పటకీ కథకు అవసరం లేని సీన్స్ తో కథనం నెమ్మదిగా సాగుతున్న ఫీలింగ్ కలుగుతుంది.
ఇక కొన్ని సన్నివేశాల్లో అయితే కామెడీ మరీ సిల్లీగా అనిపిస్తోంది. ముఖ్యంగా జస్ట్ రింగ్ కోసం సునీల్ అబద్దపు పెళ్లి చేసుకోవడం, తన ఫ్రెండ్ సునీల్ ని మోసం చేసి మరీ నరేష్ పెళ్లి చెయ్యటం ఇలాంటి లాజిక్ లేని సీన్స్, ఫేక్ ఎమోషన్స్ కొన్ని సగటు ప్రేక్షకుడికి కూడా మింగుడు పడవు.
దర్శకుడు సినిమాలోని ప్రతి సన్నివేశం నవ్వించాలనే ప్రయత్నంలో కన్వీన్స్ కాని స్క్రీన్ ప్లే రాసుకుంటూ వెళ్లిపోయారు. ఫ్లో లేని క్యారెక్టరైజేషన్స్ తో సినిమాని నడిపించేసాడు.
సాంకేతిక విభాగం :
దర్శకుడు బీమనేని శ్రీనివాసరావు కామెడీని పండించే ప్రయత్నం చేసినా, అయన పూర్తిగా ఆకట్టుకోలేకపోయారు. అనీష్ తరుణ్ కుమార్ సినిమాటోగ్రఫీ బాగుంది. సినిమాలో దృశ్యాలన్నీ ఆయన చాలా అందంగా చూపించారు. మెయిన్ గా హీరో హీరోయిన్ల మధ్య సాగిన సన్నివేశాల్లో కెమెరా పనితనం బాగుంది.
సంగీత దర్శకుడు శ్రీ వసంత్ అందించిన సంగీతం పర్వాలేదనిపిస్తోంది. నరేష్ సునీల్ కాంబినేషన్ లో వచ్చి హెడ్డేక్ సాంగ్ ఆకట్టుకుంటుంది. అలాగే బ్యాక్ గ్రౌండ్ స్కోర్ కూడా సినిమాకి అనుగుణంగానే సాగుతుంది. సీనియర్ ఎడిటర్ గౌతమ్ రాజు ఎడిటింగ్ పనితనం ఈ సినిమాకి ప్లస్ అయింది. సినిమాలోని నిర్మాతలు కిరణ్ రెడ్డి, భరత్ చౌదరి పాటించిన ప్రొడక్షన్ వాల్యూస్ బాగున్నాయి.
తీర్పు :
బీమనేని శ్రీనివాసరావు దర్శకత్వంలో అల్లరి నరేష్ మరియు సునీల్ కాంబినేషన్ లో వచ్చిన కామెడీ ఎంటర్ టైనర్ ‘సిల్లీ ఫెలోస్’. ఈ చిత్రంలో చాలాచోట్ల కామెడీ సిల్లీగా సాగుతుంది. కొన్ని చోట్ల బాగానే నవ్వించినప్పటికీ, లాజిక్స్ లేని స్క్రీన్ ప్లే తో, వీక్ క్యారెక్టరైజేషన్స్ తో సినిమా ఫలితం దెబ్బ తింది. దీనికి తోడు కామెడీ కోసం రాసుకున్న కొన్ని సన్నివేశాల్లో మరీ నాటకీయత ఎక్కువ అవ్వడంతో.. ఆ సన్నివేశాల్లో నవ్వు రాకపోగా విసుగు తెప్పిస్తోంది. కానీ సినిమా బి.సి ప్రేక్షకులను ఎంటర్టైన్ చెయ్యొచ్చు.
123telugu.com Rating : 2.75/5
Reviewed by 123telugu Team